Николай Иннокентьевич Кондрашкин Хэжэнгэ ерэжэ, бэлигтэй олон хүбүүд сооһоо Владимир Гунзыновые шэлэжэ, « Адуушан » гэжэ хатар заажа үгэһэн юм. Мэргэжэлтэ зүжэгшын табиһан энэ хатар залуу соёлшын хуби заяанда шиидхэхы үүргэ дүүргэһэн гээд хэлэхэ хэрэгтэй. Залуу гүйсэдхэгшэ энэ хатараараа Алас Дурна зүгэй залуушуулай уулзалгада Ороноо түлөөлэлсэжэ ошоходоо, тусхай дипломдо хүртөөд бусаһан юм. Удаань Владимир Гунзынов Буряад-Монголой залуушуулай нэгэдэхи уулзалгада лауреат болоо бэлэй.
Алас Дурнын, Ороной уулзалгануудта онсо шалгарһан уян нугархы, хүнгэн солбон энэ хүбүүе оперо болон баледэй театрай хүтэлбэри ажалда уриба. Түрүүшынгээ амжалтануудые улам батадхан, мэргэжэлтэ хатарнуудай орёо олон нюусануудай эхин шатануудые Гунзыновай шудалха хэрэгтэ Ороной урлалай габьяата ажал ябуулагша, бэлигтэй багша Зинаида Николаевна Тыжеброва сэгнэшэгүй ехэ туһа хүргэжэ, өөрын онсо бэлигтэй үшөө нэгэ хатаршанай зохёохы замыень заажа үгэһэн байдаг.
Намдуу һайхан алтан намарай эдэ үдэрнүүдтэ Гунзэннорбу Гунзыновай түрүүшын багша, Буряад Ороной урлалай габьяата ажал ябуулагша Зинаида Николаевна Тыжеброва 75 наһанайнгаа ойн баярые тэмдэглэбэ гэһэн мэдээсэл радиогоор дуулабабди. Буряад Ороной урлалай элитэ зүжэгшэдые бэлдэһэн, мүн манай гол баатарай багша Зинаида Николаевнае үнэн зүрхэнһөө олон тоото уншагшадайнгаа зүгһөө амаршалаад, элдин энэ дэлхэй дээрэ элүүр энхэ, олон тоото шабинуудайнгаа амжалтануудаар зүрхэ сэдьхэлээ ханан, үни удаан ябахань болтогой гээд үреэнэбди.
Эгээ энэ үедэ Москвада үнгэргэгдэхэ Буряадай урлаг болон зохёолой 2-хи хубида бэлдэлгын хүдэлмэри үргэнөөр ябуулагдажа байгаа. Харюусалга ехэтэй энэ хэрэгтэ Владимир эдэбхитэйгээр хабаадажа, мэргэжэлтэ зүжэгшын бата алхам хэһэн юм.
1960 ондо Владимир Гунзынов Ташкентын хатарай һургуулида эльгээгдэбэ. Эндэ һураһан үе сагаа Гунзэннорбу Цыренович дулааханаар дурсан иигэжэ хөөрэдэг: « Мэргэжэлтэ зүжэгшэн болохо хэрэгтэмни энэ һуралсал ехэ туһатай байһан даа. Мүн эндэ олон яһатанай түлөөлэгшэдтэй – монгол, вьетнамуудтай дүтөөр танилсажа, олон жэлнүүд соо холбоо барилсаагаа таһалаагүй ябаһанби ».
Буряадай журналистикын аха захатан Цырендулма Цыреновна Дондогой Гунзэннорбу Цыренович Гунзыновай 60 наһанай ойдо зорюулһан « Найман үглөөнэй улаан наран » гэһэн очерк соогоо иигэжэ бэшээ һэн: « Ташкентдэ дүрбэн жэл һурахадаа, мэргэжэлэй талаар ургаһаниинь, уран бэлигээ мүлиһэниинь хэлсээнгүй даа. Тиигээд лэ оперо баледэй театрай балетнэ зүжэгүүдтэ, онсолбол, П. И. Чайковскиин « Хун шубуута нуур » мэтын бүтээлнүүдтэ гол партинуудые гүйсэдхэжэ эхилһэн байна. Гэбэшье аза талаан буруулжа, баледэй зүжэгшэнүүдтэ тохёолдодог үбшэн – булшанай шүрбэһэн гэмтэжэ, дуратай мэргэжэлээ орхихо баатай болоо һэн. Энэ ушарай тохёолдоогүй һаа, магад баледэй томохон мэргэжэлтэн боложо, үндэр нэрэ зэргэнүүдтэ хүртэхэ байгаа аалам, хэн мэдэбэ ».
Владимир Цыренович зохёохы ажалайнгаа эхиндэ шанга сохилтодо оробошье, бэеэ шангаар барин, эрдэм мэдэсэеэ улам дээшэлүүлхые оролдоо һэн. Тэрэ һуража байһан Н. Крупскаягай нэрэмжэтэ соёлой һургуулиһаа зүбшөөл абажа,
60