Д . Банзаровай нэрэмжэтэ багшанарай дээдэ һургуулиин түүхын шэглэлдэ һуралсалаа үргэлжэлүүлээд , эрхимээр дүүргэһэн юм . Владимир Гунзынов Хангаловай нэрэмжэтэ түүхын музейн захиралаар , Буряад Ороной музейнүүдэй захиралай орлогшоор , Хүүгэдэй урлалай һургуулиин захиралаар аша үрэтэйгөөр хүдэлмэрилһэн габьяатай .
Владимир Цыренович харюусалгатай , алишье тушаалнуудта ябахадаа , хүнэй талые харадаг хүтэлбэрилэгшэдэй нэгэн гээд тоологдодог байһан . Эдэ бүгэдын хажуугаар аха нүхэрнай бүжэг эмхидхэхэ , түрэ наада , мүн ойн баярнуудай хэмжээ ябуулгануудые хүтэлбэрилхэдөө , буряад арадайнгаа ёһо заншалнуудые һэргээн , үреэлэй һайхан үгэнүүдые уран шүлэгүүдэй , дуу хүгжэмэй аргаар аятай зохидоор хэрэглэжэ , хүн зоной магтаал хайрада хүртэһэн алдартайл . Мүн Владимир Цыренович Буряадай телерадиокомпанида тележурналистаар ажаллахадаашье , үндэһэн соёлоо үргэлсэжэ ябаһан байдаг .
Владимир Цыренович аха захатанһаа хүниие эмшэлхэ , мүн шажан мүргэлэйшье талаар ехэ юумэ бүтээхэ аргатай хүн болохо аад , юрэ ябанаш гэжэ хэлүүлһэнэй һүүлээр Улаан Баатарай Буддадын шажанай һургуулида һурахаяа ошоһон бэлэй . Эндэ һураха үедөө Владимир Гунзынов Бакула римбүүшэһээ « Гунзэннорбу » гэжэ нэрэ абаад , үргэн ниитэдэ мэдээжэ болоһон намтартай .
Гунзэннорбу Цыренович Оросой Холбоото Уласай арадай зүжэгшэн Ч . Гениновэй , ОХУ-гай габьяата зүжэгшэн С . Таровай , Буряадай арадай зүжэгшэн С . Рабсаловай бэлиг шадабариие бодотоор үргэлүүлжэ ябана . Зали ехэтэй соёлшон Хэжэнгэ , Ага , Сэлэнгэ , Усть Орда , Монгол һайхан ороноор , Хитадаар , Түбэдөөр ябаха үедөө суглуулһан арадай аман үгын баялигуудые шадамараар хэрэглэжэ , хүн зоной зүрхэ сэдьхэлые хүлгөөдэг шиддитэй .
Мүнөө үедэ Гунзэннорбу Цыренович Бүгэдэ буряадуудай гол һонин болохо « Буряад үнэн » - « Дүхэригэй » хуряангы шэнжэлэлые сэнхир экранаар уран гоёор уншажа , бэелүүлжэ байһан үүргыень үргэхэ , дэмжэхэ талаар эмхидхэлэй горитой хүдэлмэри ябуулна гээд онсолхо хэрэгтэй . Гунзэннорбу Гунзынов түрэл һониндоо соёл , урлалай элитэ ажал ябуулагшад тухай түүхын болон шажан мүргэлэй асуудалнуудаар һонирхолтой зураглалнуудые бэшэжэ , уншагшадай магтаалда нэгэнтэ бэшэ хүртэжэ байдаг .
Гунзэннорбу Цыреновичые түрэһэн үдэрөөрнь амаршалаад , хүрьһэтэ энэ дэлхэйн хамаг һайханиие хүсөөд , иимэ үгэнүүдые зорюулаан :
Сэдьхэлэйнгээ халуун ольһые Соёлой ажалда зорюулжа , Суута хүнүүдэй тоодо Сог залитай ороһонта . Үеын үеһөө ерэһэн Үзэсхэлэн һайхан заншалаа Улам эршэтэйгээр хүгжөөлсэн , Улад зоной сэдьхэл Урмашуулаан баярлуулһан алдартайт .
61