саарһан хэрэг барюулаал даа : « Намсарайн Бадма гэгшэ хамтын байдалда шурган ороод хүдэлжэ ябана , тэрэниие зайсуулха хэмжээ абагты » - гэһэн тэмдэг КГБ-эйн табидһадта барюулагдаһан байгаа . Тиигэжэл тэрэ намарай хүйтэн үдэшэ абамнай гансаараа улаан сурба хүүгээдээ орхижо , сүлэлгын харгыда гараа агша бэлэй даа . Мэшээгтэй юу хээгээ ара нюргандаа үргэлэнхэй .
Ново-Павловскын түмэр замай үртөөһөө гал тэргэдэ һуугаад , Горхон үртөө ерээ . Эндэ , Элхидэ , Загарайда , Хориин түбтэ хүдэлөө . Удаань Хөөрхэ нютаг орожо ерээ . Хойноһоонь « тагнуул » табигдаагүй . Жэлэй болзор соо иигэжэ ябаа .
1942 ондо гэр бүлэеэ Зугмаариһаа Хөөрхэ асараа , гэр бүлэдэмнай ехэ баяр болоо һэн .
Манай эсэгын хэжэрхиһэн гэм гэжэ юун байхаб даа , хүнэй урдуур хүндэлэн « модо » хаяагүй сагаан сэдьхэлтэй хүн юм һэн даа . Эсэгэмнай тон залуугаар 1952 ондо наһа бараа һэн .» - гэжэ эсэгэ тухайгаа Цырендоржэ хөөрөө һэн . Тойрожо гарахын аргагүй оршолон … Цырендоржэ Намсараевич өөрынгөө намтар тухай хөөрэхэдөө : « 1928 оной июлиин 25-да Зугмаари нютагта түрэһэнби . Минии дүүнэр Цыренханда , Баатар , Цэрмаа – булта амгалан һайнууд ажаһуунад . Манай абаһаа хойно эжымнай хорёод жэлдэ һуужа байһанаа 1973 ондо аялаа һэн .
Зугмаарида эхин шатын һургуули дүүргээд , удаань Ново-Павловкын долоон жэлэй һургуулиие дүүргээд , Хөөрхэ ерээ һэм .
Эсэгэ дайнай эгээл хүндэ хүшэр үедэ хамтын байдалай ажалда хам оролсожо , харанхыһаа харанхы болотор ажаллаха баатай бологдоо һэн . Хөөрхэ нютагта 11- 12-той наһанһаа зунай үбһэнэй үедэ бухал шэрэхэш , һүришье хаягдаа . Эрэшүүл булта дайнда мордонхой .
Хөөрхэһөө Новоильинск натур-орооһо тушаадаг байгаабди : Гурбан сарнуудые хүллэнхэй орооһо шэрэгшэ һэмди . Удаань бригадир тушаалтай болоод , гурбан морёор шэрэгшэ бэлэйб .
Һүүлдэнь 1943 ондо зургаан һарын малай эмшэнэй ангида һуража , Хөөрхэдөө малай эмшээр ажаллааб . Ербановай нэрэмжэтэ хүдөө ажахын техникум дүүргээб . 1950 ондо сэрэгтэ абтааб . Комсомольск-на-Амуре гэжэ хотодо гурбан жэл зургаан һара алба хаагааб зенитнэ артиллеридэ . Һүүлдэнь 1953-54 онуудта эсэгынгээ нютаг Зугмаари бусаабди . 5 жэл соо нютагтаа ажаһуугаабди .
1958 ондо Хөөрхэ нютагаа бусаабди . Фельдшерээр , бригадираар , отделениие даагшаар ажаллааб .
« Первомайский » хамтын байдалай эмхидхэгдэхэдэ , захиралынь Леонид Васильевич Бадуев , захиралай орлогшоор ажаллааб .
1970 ондо Хэжэнгын аймагай түбтэ малай эмшын үртөөдэ дезинфекционно бүлгэмэй ахалагшаар ажаллааб . 1975 ондо хүдөө техникын наймаанай базын захиралэй тушаалда 9 жэлдэ хүдэлөөб .
54