дүрбэтэйхэн Баяр хүбүүхэниие хажуудаа энхэржэ , сэдьхэлээ ханан hуунал хэбэртэй .
Эхын зүрхэн али олон бэрхэшээлнүүдые үзэхэ , харахадаа шулууданхай : энэ юртэмсын орёо хүндэ байдалай жама ёhо ойлгодог болонхойнь эли – муу юумэн тухай гансаш үгөөр дурданагүй даа . Ороhон айлшадаа эдеэнэйнгээ дээжэ : сай , сагаан эдеэ табагаараа хүндэлөөд лэ , али зүйлые hайн hайхан тээшэнь хөөрөөд лэ hуунал даа . Иимэл эжынэр бултанда алдар жэшээ боложо , боди сагаан сэдьхэлээрээ ашатын буян арьбадхана гээшэ ааб даа .
Жамбалдоржэ хүбүүниинь гэр бүлэтэеэ Хэжэнгэдэ ажаhууна , 4 үхибүүдтэй . Барилгада гагнууршанаар ажаллана . Нүхэрынь багша .
Дашань багша мэргэжэлтэй , Хэжэнгэдэ ажаллана , 3 үхибүүдэй эсэгэ . Даша багаханhаа өөрэхэн , сэбэрхэн , монсогонуур шуран , номдоо хурсахан хүбүүн юм hэн . Yнихэнш болоо даа , нэгэтэ уулзахадам , хаhатайшаг томоозгой болонхой ябаа hэн . Бэрхэл багша болоhон байха .
Арсалан абари зангаарааш , дүрэ шарайгаарааш эгээл эсэгэеэ hажааhан хүбүүниинь гээд hанагшаб . Ехэ хүхюун , хөөрүү зугаатай , элбэг тэнюун шарайтай , 2 үхибүүдэй эсэгэ , нютагайнгаа басаган хани нүхэртэй юм . Улаан Yдэ шадарай Шулуута гэжэ hууринда түбхинэнхэй ажаhууна , ажаллана .
19 ашатай , 11 гушатай Цырендулма Жамсараевнада удаан наhа наhалжа , олон үринэрэйнгөө жаргалаар жаргахые үреэнэбди .
Ашата олоной эжые шүлэгшэн М . Р . Чойбоновой эжыдээ зорюулhан шүлэгөөр үреэебди :
Сахилза бодолтой , ходол зулгы , Сарюухан hуугыш даа , ашата эжы ! Yбэл , зунгүй , һанан , дурсан хүлеэнэш , Yндэр түрэлтэ үргэн дэлгэр эжымни ! – гэжэ бултал үхибүүдынь үреэнэл бэзэ …
1993
ХУБИИНГАА ЖАРГАЛТАЙ БҮЛЭ
Шэтэ можын Петровск-Забайкалиин аймагаар баруулжаа хүсэтэйгөөр урдадаг үргэн Хёлго хатан алдартай голой эрьедэ хадалиг газарта Зугмаари нютагта Батанай угай Шобоолойн Найданай Намсарай 1902 ондо бүлэдэ түрэһэн юм . « Путь Ленина » хамтын байдалда ажалладаг һэн . Ажалдаа үнэн сэхээр хандадаг , эрхимээр ажаллаһанайнь түлөө « Алдарта стахановец » гэһэн шан хамтын байдалайнь түрүүлэгшэ барюулһан байна . « Эжымнай Хэжэнгын аймагай Хөөрхэ Баадуугай Сэмжэд . … 1941 оной дайнай эхилээд байһан намар абымнай нэрэ дээрэ хэншье бэлэй
53