"Эхэ нютаг Хоорхэмни" Эхэ нютаг Хоорхэмни | Page 54

ЭНЭРХЫ ЭХЫН YХИБYYД
Дундуур бэетэй, дүүрэн шарайтай, харахада ехэл тэнюун сэдьхэлтэй олонойл
эхэ гэжэ ойлгохоор эхэнэр Хөөрхэ нютагтаа Борисай эгэшэ гэжэ алдаршанхай
юм. Энэ хадаа зургаан үхибүүдэй эжы Цырендулма Жамсарановна мүн гээшэ.
Һаяхан тэрээнтэй уулзажа, ажабайдалаарнь hонирхобоб.
- Багадаа үншэржэ, үнжэгэн үхибүүн ябахадаа, хүнэйш үри болоод үзэhэн
хүм. Хараалгаhан, харшалуулhан, али зобоhон, тулиhан, зүдэрhэнөө тооложо
барашагүй юм ааб даа. – гэжэ хэлэхэдэнь, саашань hуража, хүндүүлхэй, үбшэнтэй
газарыень hэндээжэ болохогүй ха юм даа гэжэ бодобоб.
Залуудаа, эдир наhандаа хамтын байдалай хамаг юрын ажал хэжэ, бүхы
наhаяа үнгэргэhэн хүн гээшэл даа. Һайн эхын түрэhэн үри хадаа дала гаратараа
(мүнөө 73 наhанайнгаа жэл оруулжа ябана) элүүр энхэ, аша гушанараа харалсажа,
үргэлсэжэ hууна.
Бүри залуу ябахадаа hаалишанаар ажаллагша hэн. Тэрэ мэргэжэhэн ажалаа
орхёогүй hэн. Наhанайнгаа амаралтада гаратараа ажаллаа.
Эдир ябахадаа, Жигмидэй Доржэ гэжэ нютагайнгаа хүдэр ажалша нүхэртэй
боложо, олон үхибүүдэй эжы, аба болоо, юрын хүнэй жаргал эдлээ hэн. Доржэ
набтаршаг аад, бата бэетэй, хүхюун хөөрүү зугаатай хүн гэжэ hанагшаб. Yнихэн
болоо даа, үхибүүдэйнгээ туханда хүрэжэ шадаагүй, хүндэ хүшэр үбшэндэ
нэрбэгдэжэ, наhа барашаhан юм даа.
Борисай эгэшэ урдаа хаража ябаhан хайран нүхэрhөө олон үхибүүдээрээ
гээгдэбэшье, гомдол гашуудалда дарагдажа ябаагүй, бэеэ шангаар барижа,
үхибүүдээ өөрөөл өөдэнь болгоhон, тухандань хүргэжэ табиhан хүн гээшэл даа.
Ашата эхэ эсэгынгээ буян хэшэгээр элүүр энхэ үринэрынь өөдөө үндыхэдөө,
хүнэйл зэргэ хүдэр хүбүүд, басагад, айл аймагууд боложо түбхинэнхэй.
Дэлхэйн шэмэг – сэсэгүүд,
Хүнэй шэмэг – үринэр,- гэдэг ха юм даа.
Энэрхы эхын үхибүүд тухайнь хөөрэхэ хүсэлэнтэйб.
Ехэ хүбүүн Бористан. Тэрэнэй хани нүхэрынь, Надежда Намжиловна, залуудаа
Хөөрхын эхин hургуулиин багша ябаhан, 5 үхибүүдтэй. Бултадаа наhанайнгаа
мэргэжэл олонхой: багша, инженер, экономист. Ехэ хүбүүниинь Эрдэм
нютагтаа хүдөө ажалшадай эблэлые хүтэлбэрилэгшөөр ажаллана, хүдөө ажахын
мэргэжэлтэй. Yхибүүн ябахаhаа зөөлэхэн, даруухан юм hэн. Тэрэл хэбэрээ
ажалша, зондоо хүндэтэй хүтэлбэрилэгшэ болонхой.
Эсэгэнь өөрөө нютагтаа олон жэлдэ жолоошоноор ажаллаhан юм. Мүнөө ой
модые, байгаалиие хамгаалалсаха ашатай ажалда хүдэлнэ.
Долгор гэжэ ганса басагатай юм hэн. Эжыдээл адли түбшэн даруу зантайхан,
дүрбэн үхибүүдэй эжы боложо, нүхэртэеэ жаргахынгаа тэндэ наhа барашаhан
юм. Хүбүүд үринэрөөр олоншье hаа, гансахан басагаяа алдаха гээшэ эхэ хүндэ
хэды гашуудалтай бэ? Эхын амин гол амяараал хадань, эхэhээ гээгдэhэн зээнэрээ
харалсажа, өөдэнь үргэлсэхэ хэрэгтэй… Мүнөө дүрбүүлэн өөдөө болонхой.
Буурал эжынь Долгор басаганайнгаа басаганhаа түрэhэн, зээнсэр болохо
52