молотилкаар сохихоёо эжынэртээ ошогшо hэмди даа. Yдэрынь таряанай боолто боолсодог байгаа. Илалта дүтэлүүлсэжэ, үдэр, hүниие илгангүй ажалладаг ямар баатар эхэнэрнүүд байгааб даа! Тэрэ үеын техникэ мүнөө музейдэшье үгы шахуу. Yнгэрhэн хүндэ сагай сууряан болоод лэ үнгэршөөл даа. Гансал үринэрынь hанаандаа бүхөөр хадагалан үлэнхэйбди.
Балма эдирхэн хаhадаа наhанайнгаа нүхэртэй ушаржа, хуби заяагаа нэгэдээ hэн. Нүхэрынь Гунзынов Дамбинима Цыренович, ажалай болон дайнай ветеран, Дээдэ Хэжэнгынгээ һомондо, хамтын байдалай харюусалгатай тушаалта ажалда хүдэлжэ, наhанайнгаа амаралтада гаранхай.
Балма олоной эжы боложо, үринэртөө эрхим hургаал үгэжэ, мэргэжэлтэд болгожо, далижан ургажа гаранхай. Бурханай үршөөлөөр бэлигтэй хүбүүд, басагадые хүмүүжүүлжэ, hургажа, бултанай гарыень ганзагада, хүлыень дүрөөдэ хүргэжэ, ашатын буян эдлэжэ, Балма Дамбиниматаяа жаргажа hуудаг юм.
Хөөрхы эжынь, нютагтаа « Дамбиихайн эжы » гэлсэгшэ hэмди, долоон ашанараа бултыень энхэржэ, нарайhаань үргэлсэжэ, өөдэнь болголсоhон юм. Хүнэй ороходо, хошон зугаа дэлгээжэ, даараhаниие дулаасуулжа, ангаhаниие ундалуулжа, hургаал үгөөрөө үреэжэ hуудаг hэн. Бурхан шажандаа ехэл шанга шүтэдэг бэлэй.
Һарын дүйсэн бүхэндэ, ном судар барижа, хотоноо тойрожо, гороо мүргэл хэдэг байhан юм. Тэрэл аша буянгаарнь булта үринэрынь, аша, гушанарынь сэхэ сэбэрээр ябадаг юм, гай гасаланшье холуур зайладаг гэжэ ойлгогшоб.
Доржэма аша басаганиинь хөөрөө hэн: « Эжымнай хэhэн буян, зааhан hургаал бултандамнай нангин, дурсан hанажа, сахижа ябадагбди. Ямаршье хүндэ тэгшэ hайнаар хандажа ябагты гэгшэ hэн.
Эжымнай мордошоhон хойно үетэнииньби гэжэ Жанадарын эжы – Сэрмаа гэжэ нэрэтэй hэн хаш, « юм » барижа, тосхоноо тойрожо, баhал hарын дүйсэнгүүдтэ гороо мүргэл хэдэг байгаа. Хэн нэгэн гороо мүргэл хэжэшье болоо ёhотой. Гэртэхимни ашата эжынгээ hургаалаар, аха аргаараа ядаhан хүндэ туhалхыел оролдожо hуудаг юм. Урдамнай Казанцевтан гэжэ 10-аад үхибүүдтэй бүлэ ажаhуугша hэн. Тэдэнэртэ али болохоор туhалагша hэмди гээд hанагшаб.
Эжымнай манай багаханhаа хамтын байдалда саг зуурын ажалда хүдэлжэ, эсэгэтэймнай хамта газар уhалалгын ажалда хүдэлэлсэжэ, наhанайнгаа амаралтада гараhан гээшэл даа. Мүнөө энэ сагай хүндэ үедэ баhал мандаа али болохоор туhалжа, аша зээнэрээ харалсажал, эсэгэтэеэ хоюулаан hуудаг юм »,- гэжэ Новокижингинскын дунда hургуулиин эрхим багшанарай нэгэн гэртэхин тухайгаа хөөрөө hэн.
Доржэма өөрөө багаханhаа тэршээ өөрэхэн, сэбэрхэн, номдоо хурса басаган юм hэн. Ехэл хошон хөөрүү зугаатай, хоёр үринэрэй эхэ, Цырен нүхэртэеэ дүршэлтэй багшанар юм. Һурагшадынь эрхим мэдэсэтэй боложо, дээдэ hургуулинуудта амжалтатайгаар hурадаг.
Паламдоржэ хүбүүниинь баhал багшын дээдэ мэргэжэлтэй, мүнөө Хори тосхондо налогово полицида ажаллана, 3 үхибүүтэй, нүхэрынь СПТУ-гай багша. Паламдоржэ эсэгэшүүгээ даруухан зантай, томоозгой бүдүүн хүн болонхой гэжэ ажаглаа hэм.
50