баруулжаа урдадаг голой урда бэедэ һуурижаһан Тэрэбхээн гэжэ нэрэтэй юм.
Бишыхан Агван тоонто нютагайнгаа бэлиг хэшэгтэнь хүртэбэшье, сагай эрхээр Хэжэнгын голой Эдэрмэг нютаг руу гэртэхинээрээ ерэһэн юм.( Эсэгэнь Доржэ Борбоев « Первомайский » хамтын байдалай захиралаар томилогдожо, гэр бүлэтэеэ нүүһэн гээшэ.)
Шэнэ нютагынь гүлмэрхэн хүбүүнэй ургаха, һураха замда удхатай байгаал даа. Энэмнай Х. Намсараевай, Б. Базароной, Ж. Батуевай, олон тоото мэдээжэ зүжэгшэдай, эрдэмтэдэй тоонто, дэмбэрэлтэй һайхан нютаг гээшэ.
Үни болоо даа. Эдэрмэгэй һургуулида айлшаар ерэһэн мэдээжэ шүлэгшэн Данри Данилович Хилтухин һурагшадта хандажа хэлээ агша һэн: « Таанар, үхибүүд, Хоца Намсараевай нюсэгэн хүлөөрөө гэшхэһэн газар дээгүүр ябанат, наадажа өөдөө болоһон шугы соогуурнь гүйлдэнэт, уужа ехэ болоһон уһаарнь ундалнат, амилһан агаараарнь амилнат. Энэл нютагһаа бэлигтэй хүбүүд басагад ургажал байха ёһотой ». Эдэ үгэнүүдыень мартагшагүйб.
Эдир хүгжэмшын өөдөө ургаха замда нютагаймнай үрэжэлтэ газар, уһан, агаар, аха зоной үреэл үгэнүүдшье дүнгэлсөө аалам. Дээдэ Хэжэнгын дунда һургуулида һуража, дунда эрдэмэй дүн абатараа, Агванай мэдээжэ хүгжэмшэ болохо замайнь эхин Эдэрмэгһээ гэхэдэ болоно. Эдэрмэгэй хүгжэмэй һургуулиин фортепьянын ангида һуража гараа. Багшань Бимбаева Цыпилма Будуевна мүнөөшье хүгжэмэй тэрэл һургуулида захиралаар ажаллана. Багшань һурагша тухайгаа хэлээ агша һэн: « Агван зааханһаа хүгжэмшэ, дууша болохо түрэлхиин табисууртай байһан юм гэжэ һанагшаб.
Гэртэхиниинь, илангаяа эжынь, ехэл һаналаа табидаг юм һэн. « Хүн болохо багаһаа, хүлэг болохо унаганһаа » гэдэгтэл, Агван зааханһаа хүмүүжэл һайтай, сэбэрхэн, сэмсэгэрхэн, хододоо журамтай ябадаг һэн ».
Миниишье һанахада, һурагшадай һайндэрэй, наада харуулганай болоходо, тайзан дээрэ эхин ангиин һурагша Агван гоёхоноор дуунуудые дуулажа байгша һэн.
Нагасын уг- зээдэ гэдэгэй ёһоор, хүбүүхэнэй нагаса аба дууша хүн байһан ха. Угаа уһанда хаядаггүй гэжэ зон дэмы хэлсэдэггүйнь зүб ха юм даа.
Агван һургуулияа эрхимээр дүүргэһэнэй удаа Буряадай багшанарай һургуулида орожо, физикэ-тоо бодолгын шэглэл дүүргэжэ, тоо бодолгын багша мэргэжэлтэй боложо гараһан байна. « Наһанайм мэргэжэл олохо замда туһа хүргэһэн багшанартаа, тоо бодолгын багша Мясникова Мария Павловна, Бимбаева Цыпилма Будуевна гэгшэдтэ наһандаа үритэйб гэжэ бодогшоб »,- гэхэдэнь, һайн үринэрэй сэдьхэлдэ һайхан бодол ходол ябадаг гээшэл даа гэжэ һанажа һуугаа һэм.
155