Балдан ахамнай гансааран өөдөө болоогүй. Даадяан Цэмпилэйхи-hээ абтаhан Цэжаб гэжэ үргэмэл дүү басагатай hэн. Дамдинтан хүбүүн басаган хоёртой түгэд айлайхи нютагтаа ажаhуугаал даа. Цэжаб мүнөө Хэжэнгэдээ үнэр бүлын эжы наhанайнгаа амаралтада ан-бун ажаhуудаг юм. Yе-үе болоод лэ ахындаа үрмэ тоhон хэшэгтэй айлшаар ерэлгэтэйл байдаг.
Хүнэй хэhэн хэрэг, ажабайдалай ёhо заншалые үри бэенэр үргэлжэлүүлдэг гээшэ. Тиимэhээ мүр сараагүй оршолонhоо халин ошонобди гэжэ огто болохогүй. Һайн хүнэй дүрэ мүнхэ шэнги үлэдэг ха юм.
Ахындаа ороод, абгайхантаяа аяга сайень уужа, амтан эдеэень эдилсэжэ, хошон зугаагаа хөөрэлдэжэ hуухадаа, ахынгаа талаар ошоод, мэнэ ерэхэеэ ябаhан шэнги мэдэрэлтэй байхаш.
Абгайхамнай булта түрэлхидтөө хүндэтэй, хүсэн түгэс, олон аша, үринэрөө тойруулжа, уран оёдолоо, хургы торгоёо эсхэhээр, хошон зугаагаа дэлгэhээр, анханайнгаа омог зангаа алдаагүй, ажабайдалай орёо хүшэр замые дабалсажа, маанараа hайхан сэдьхэлээрээ дэмжэлсэжэ ябаhандань баясадагбди.
Түгэсхэлдэнь ахатанайнгаа үнэр бүлэ, абгайханаа үреэебди – дүтынь түрэлхидэй зүгhөө.
Ажабайдалай хүшэр замые Эрэлхэгээр дабаалта, Ажалай хүндые тэсэжэ гараалта. Үри хүүгэдээ үндылгэжэ, Үргэн харгыдань гаргаалта, Үндэр наһанай жаргалые Үзэхэ буянтай байгаалта. Саг жэлэй ошохо бүри Сарюун зангаараа ябыт даа.
1999
« ТЭНГЭРИИН » ДУУШАН
« УРДАҺАА нэлбэрхэй Һэбхеэн уула уужамхан нютагым шэмэглээд байн » гэжэ Хэжэнгын буряадууд дууладаг. Хэжэнгын үргэн гол Хёлгын гол хоёрой дунда нюргалан, шүдэр хушата, саһата оройгоороо ялбайран толботон, зунайшье халуунда харагдажа байхадань, ямар бэ даа һонин энэрхы, омогорхохо мэдэрэл түрүүлдэг жэгтэй һайхан нютагууд байдаг лэ.
Иимэл һайхан үргэмжэтэй нютагуудта түрэжэ, үендөө хүрэхэ талаантай байһан залуу дуушан, композитор Агбан Борбоев тухай үнихэнэйл уншагшадтаа хөөрэхэ бодолтой ябадагби.
Эдир дуушанай түрэһэн нютаг хадаа Хёлго хатан эжы гэжэ алдартай, мойһоной шугы эрьетэй, дундуураа үндэрөөр нюргалан, харлан харьялан һүртэйгөөр
154