1993 ондо һургуулиаа амжалтатай дүүргэһэнэй удаа хоёр жэлэй туршада сэрэгэй албанда ябажа ерээ. Удаань Улаан Үдынгөө 29-дэхи гимназида тоо бодолгын багшаар ажаллаа.
Тэрэнэй һүүлдэ « Тэнгэри » студида хүдэлөө. Хүтэлбэрилэгшэнь Буряадай арадай зүжэгшэн, дуушан Анатолий Бутуханов.
Буряад оронойнгоо хүгжэмшэдэй дунда зохёохы замайнгаа эхиие амжалтатайгаар захалһан залуу хүгжэмшэ, дууша Агван Борбоев олон харилсаатайгаар ажалладаг. Агын тойрогой Урта нютагта ажаһуудаг багша мэргэжэлтэй Доржэханда Цынгуевагай үгэнүүд дээрэ бэшэһэн « Ургыхан », « Хүдөө нугадаа », « Ушарсамни, ерээрэй », « Сагай сууряан » гэһэн дуунуудынь минии сэдьхэлдэ ехэ таарама байдаг.
Сэлэнгын аймагай Жаргаланта нютагай РОВД-гэй мүрдэгшэ Нимаева Виктория гэжэ залуу нүхэртэй харилсаатай болонхой. « Эжымни зүрхэн- зэндэмэни » гэһэн дуу зохёогоо.
Баргажанай аймагай Хилгана нютагай Базаров Заято Базаровичай үгэнүүд дээрэ « Хилгана », « Балшар наһанайм Боргол », « Наһамнай үнгэрнэ » гэһэн дуунууд бэшэгдээ.
Бэшүүрэй аймагай Шэбэртэ нютагай Гомбожапов Тимурай үгэ дээрэ « Мүшэтэ һүни », « Айл бүлын магтаал », « Намарай набшаһад » гэһэн дуунуудые зохёонхой.
Мэдээжэ шүлэгшэн Гунга Гомбоевич Чимитовэй « Һарата һүни » гэһэн шүлэгые дуун болгоо.
Залуу хүгжэмшэ зохёохы ажалайнгаа эхин дээрэ иимэ олон дуунуудай зохёолшон болонхой. 1994 ондо « Сагаан һара » гэһэн һайндэрэй шанда хүртэһэн байна. 1994 оной июль һарада Монгол уласай Улаан Баатар хотодо үнгэргэгдэһэн « Их наадам » гэһэн хүүгэдэй бүхэдэлхэйн уулзалгада амжалтатайгаар хабаадалсаһан байна.
1995 ондо хэблэгдэһэн « Буряадай эстрадна дуунуудай суглуулбарида » дуунуудынь оролсоо һэн.
Ургажа ябаа залуу хүгжэмшэ Агвантай Буряадай радиогоор хэгдэһэн хөөрэлдөөнһөө дурдая: « Тайзан дээрэ гарахын урда ехэ бэлэдхэл хэрэгтэй ааб даа. Бүжэгтэ хабаадахадаа, сэдьхэлдээ мүндэлһэн дуутайл һаа, тэмсээнүүдтэ хабаадажа боломоор. Тиихэдээ онсо өөрын түхэл маягтай байха ушартай.
Ямаршье дууе хүгжэмэй хамталаг, оркестр дэмжэн наададаг. Тэдэ оркестр, хамталагда ямар зэбсэг бииб, композитор хүн дуу зохёоходоо, гансал дуунайнгаа аялгануудые харуулдаг бэшэ, хажуугаарнь зэбсэг бүхэндэ партитура зохёодог гэхэ юм гү- нэмэлтэ бэшэдэг гэжэ хэлэел даа.
Хүгжэмшэ болохын талаар тон ехэ ажал урдамни. Тиибэшье багша мэргэжэлтэй болоһондоо омогорходогби, халагладаггүйб. Минии дуунуудые зон яһала мэдэдэг, дууладаг, магтадаг болоо гэжэ сэдьхэлдээ баясадагби. Тиигэбэшье намтай хөөрэлдэһэн хүн хэлэдэг: « Шинии дуунууд айхабтар орёо, дуулахада хүшэр, сээжэлдэхэдэшье ульгам бэшэ. Тиихэдэнь би иигэжэ харюусадагби: « Дуу зохёоходоо, халуун зүрхөөрөө бэшэдэгби. Тэрэ дуунай үгэнүүд иимэл аялгатай байха ёһотой гэжэ минии сэдьхэл ойлгодог.»
Хүгжэмшэдэй хэлээр хэлэхэдэ, аялгымнай далайса айхабтар үргэн, аяар хоёр октаваһаа гаража тарадаг.
156