Үнэхөөрөөшье, хүндэлэнгүй байха аргагүй юм. Владимир Ивановичай орожо ерэмсээр, шог зугаа, хүхюу хөөрэлдөөн болошохо. Ямар нэгэ һайн үгэ гү, али һонин дурадхал дуулахадаа, үхибүүн шэнгеэр баярлаха, хүхихэ. Нэгэ иимэ ушар дурдая.
1994 ондо һэн ха. Хэшээл үнгэргэжэ байтараа, уг гарбал тухай һурагшадтаяа хөөрэлдэбэб. Шабинараймни 99 хубинь « Би хотын би » гэжэ мэдүүлбэ гээшэл даа. Теэд иигэжэ мэдүүлһэн үхибүүдэй эхэ эсэгэнэр хүдөө нютагһаа гарбалтай байба.
Энээнһээ уламжалан, би ехээр бодолгото боложо, захиралдаа хандажа, « Би хотын би » гэжэ буряад үхибүүдэй мэдүүлдэг гуримые болюулхын тула, уг гарбал тухай эрдэмэй-дадалгын бага хурал үнгэргэе гэжэ дурадхабаб. Владимир Иванович намайе тон анхаралтайгаар шагнаад, удаань угаа ехээр баярлаад: « Тиигэе, тиигэе! Та энэ хэрэгые эмхидхэгты!» гэбэ. Энэ бага хурал үнгэргэхын тула буха ехэ бэлэдхэл хэһэн байхабди. Энэ хэрэгтэ бүхы һургуули, түрэлхид, олониитын түлөөлэгшэд( Социалис Ажалай Баатар Ц. Н. Номтоев, Оросой габьяата багша, профессор Ж. С. Сажинов, эрдэмэй кандидадууд В. Ш. Гунгаров, С. Д. Бабуев) хабаадаа һэн.
Үхибүүд эхэ эсэгынгээ туһаламжаар уг гарбалайнгаа һарбаалжа зохёожо, хэнэй хүбүүн хэн байһанаа һайн ойлгоо. Жэшээнь, Ламажапов Алёша гэжэ хүбүүн Барга баатарһаа, эхилээд, өөр хүрэтэрөө 25 үеын угай модон бэшэһэн юм. Тэрэнь һургуулиин музейдэ табяатай.
Владимир Ивановичай дэмжэлгээр, туһаламжаар һургуулидамнай хэды иимэ хүдэлмэри хэгдэһэн гээшэб- бултыень тооложо барашагүй.
Харин ажалдаа тон харюусалгатай юм. Багшанарай зүблөө хэхэдээ, хойно хойноһоонь тоб-яб тоолоод, тон лэ хэрэгтэй юумэ хэлэхэ, үлүүе огто шашахагүй.
Би наһан соогоо элдэб һургуулида олон захиралтай ажаллаһанби. Зүгөөр иимэ залуу аад, хүн шанараараа үндэр мэдэрэлтэй, эрилтэ ехэтэй, һайн зантай захиралые ушараагүйб гэхэдэ, болохол даа.
В. И. Хамнуев манай һургуулида ерэхэһээ урид хаана юу хээб гэһэн асуудал гаража магадгүй.
Владимир Хамнуев 1981 ондо БГПИ-гэй индустриально-багшалгын шэглэл дүүргээд, Байгал шадарай аймагай Зырянскын дунда һургуулида ажалайнгаа намтар эхилһэн байна. 1986 онһоо Хабын аймагай Брянскын дунда һургуулиин багша болоод, хоёр жэл соо үүсхэлтэй һайнаар ажаллаад лэ, 1988 ондо захиралай тушаалда дэбжүүлэгдээ. Тиигээд лэ 1990 онһоо манай һургуулиие толгойлно.
1960 ондо Эрхүү можын Качугай аймагай Ацыкак нютагта түрэһэн В. И. Хамнуев залууханаар һургуулиии захирал боложо ажабайдалай хүшэр һониншье һургуули гаража ёһотой мүнөө үеын хүтэлбэрилэгшэ боложо шадаа. Саашадаа тэрэ үшөөл мэргэжэхэ, ургаха. Тиимэһээ үнэн сэхэ зантай, үлүү үгэдэ дурагүй, хэлэһэнээ хүсөөдэг, эхилһэнээ бүтээдэг энэ хүниие 1999 оной Баатар мэргэн гэжэ би нэрлэхэ дурамни хүрөө юм.
1999
129