ХЭЛЭҺЭНЭЭ ХҮСӨӨДЭГ, ЭХИЛҺЭНЭЭ БҮТЭЭДЭГ … « Баатар мэргэн-99 » гэһэн тэмсээндэ
Мүнөө үедэ һургуулинуудые һонёор, хэлэеэ нугалжа хэлэхын аргагүй холбоо үгэнүүдээр нэрлэхэ ябадал ехэ « моододо » оронги гээшэ ааб даа. Энэ талаар манай һургуулишье ондоо бэшэ. Жэшээнь, 1997 оной майн 26-да Буряад Ороной засагай дээдын зургаанай гаргаһан тусхай тогтоолоор Улаан Үдын 19-дэхи һургуули « Школадиалог национальных культур » гэжэ нэрлэгдэдэг болоо һэн.
Яахадаа энэ һургуули иимэ нэрэдэ хүртэхэ болоо юм гэбэл, эндэ зохёохы ажалай бэдэрэлгэ ходол боложо байдаг. Хүүгэдые хүмүүжүүлгын, ном һайнаар заалгын дүн гаргагдажа, 1996 ондо 19- дэхи һургуули « Жэлэй эрхим һургуули » гэһэн нэрэ зэргэдэ хүртэһэн тухай диплом абаһан юм. Энэл дүнгэй гаргагдаһанай удаа тус һургуулиин захирал Владимир Иванович Хамнуев Москва ошожо, « Жэлэй эрхим захирал » боложо бусаа бэлэй.
В. И. Хамнуев гээшэ холын хараа бодолтой, хурса, һонор хүн. Багшанарай һанамжа дурадхалые тон анхаралтайгаар шагнадаг, тиигээд һонин юумэ хэлэжэрхёо һаань, үнэнхэ зүрхэнһөө дэмжэдэг байха.
В. И. Хамнуев энэ һургуулиин захиралаар 1990 онһоо ажаллана. 1993 онһоо 1999 он хүрэтэр 511 һурагшад һургуули дүүргэжэ гараһан байна. Тэдэнэй дүрбэниинь алтан, 18-ниинь мүнгэн шантайгаар дүүргээ юм. Энэ һургуули дүүргэһэн 284 хүн дээдэ һургуулинуудта абтаа, зариманиинь дээдэ эрдэм олоһон ааб даа.
Мүнөө үедэ эдэ 90 гаран багшанар 1800 эдиршүүлые эрдэм номдо һургана. Эдэ олон хүүгэдэй хүн бүхэн өөрын зантай. Гадна багшанарташье өөр өөрын « түлхюур » хэрэгтэй.
Гэхэ зуура захиралнай залуушье һаа, мандаа эсэгэ мэтээр харагдадаг лэ. Үглөөгүүр һургуулидаа орожо ерэхэдээ, багшанартаяа тон уриханаар мэндэшэлэлсээд лэ, бүхы байшан соохи булаан тохойгоо дууһыень эрьежэ харадаг, хамаг юумэ хуу бүтэн бүлеэн гэжэ мэдэһэн хойноо ажалаа эхилдэг зантай.
В. И. Хамнуевай хүн шанарые би һайшаадагби. Нэгэдэхеэр, угаа даруу, өөрыгөө үргэхэ гээшые огто мэдэдэггүй. Хоёрдохёор, үлүү үгэдэ дурагүй. Манай бүлгэмдэ булам шанаагаар һабир-шэбэр гэлдэхэ гү, али ами амяараа бүлэглэл болохо гурим байхагүй. Юундэб гэхэдэ, хүдэлжэ эхилһэн сагһаа захиралнай тиимэ эрхэ байдал байгуулһан гэхэдэ болохо. « Хэн нэгэн үлүү булуу үгэ гаргана, үгышье һаа, хоб-жэб хэлэнэ гэжэ дуулаал һаа, үглөөдэртэнь ажалһаа гаргажа хаяхаб!»- гэжэ уридшалан мэдүүлһэн юм. Тиимэһээ багшанарнай захиралаа хүндэлхэһөө гадна, үшөө түбэгшөөдэг гээшэ ааб даа.
128