1999 ондо Саратов хотодо Дельфийскэ нааданда хабаадажа, 3 алтан, 1 мүнгэн, 2 хүрэл шан, болор хонхо шан абаабди. Оронойгаа Хүндэлэлэй бэшэг юрэнхылэгшэ Л. В. Потаповай гарһаа абаа бэлэйбди,- гэжэ Жалсан Батуевич һурагшадаараа омогорхон хөөрэнэ.
Тус һургуулиин һуури дээрэ үндэһэн цирк нээгдэһэн гэжэ бултанда мэдээжэ. Зүжэгшэдэйнь 80 %- лицейн һурагшад юм.
Хүршэ монгол ороной дүршэлтэй багшанар Улаан Баатар, Дархан хотонуудһаа энэ һургуулида ерэдэг, манай багшанар тэндэ ошожо, туһа хүргэдэг.
Һурагшад « Туяа » гэжэ зуһаландаа ехэ дуратай. Эндэ һурагшад амаржа, уһанда шунгажа, домто аршаанһаань хүртэжэ, газарай эдеэ ургуулжа, ажалай дүршэл олоно. 20 га талмай дээрэ байцаа( капуста), хэмхэ( огурцы) ургуулдаг, барилга хэдэг юм.
Һургуулиимнай ажабайдал эды үсөөхэн мүрнүүдээр харуулжа хөөрэхын аргагүй. Эбтэй ехэ бүлэдэ эрдэм бэлигэй уран һайханай хэшээлнүүд, дээдэ һургуулинуудта тусхай хэшээлнүүд, МАН, гар урлалай бүлгэмүүд, тамирай һалбаринуудай хүдэлмэринүүд боложол байдаг.
Сүлөө сагтаа һурагшад номой һанда, театрта, музейдэ ябадаг. Тиимэ тула, һурагшадай ажабайдал гэр ажабайдалда тон дүтэрхы.
Энэ ехэ эбтэй бүлгэмэй үндэр амжалтанууд эрхим багшанарай, захиралай, орлогшонорой дүй дүршэлһөө, хэшээл оролдолгоһоо ааб даа.
Хүн бүхэн энэ һургуулиин хүтэлбэрилэгшэ боложо шадахагүйнь сохом. Түрэлхиин даруухан, хүндэмүүшэ, ёһотой жэнхэни буряад арадайнгаа абари зан, ёһо заншал тон һайнаар сахидаг хүн гэжэ абаһаар мэдэхээр. Би хамта 6 жэл соо ажаллахадаа, иимэл хүтэлбэрилэгшэ энэ һургуулиин дарга байха, бэшэ хэншье байжа шадахагүй гэжэ оло дахин ойлгогшо һэм. Ямаршье сагта һурагшадтаа, багшанартаа даамай хүлеэсэтэйгээр һургаалай зөөлэхэн үгэнүүдээр, ульгам буряадаар аргадан, энхэрэн хэлэхэдэнь, үхибүүд сэдьхэлдээ бүхөөр хадуужа алдуугаа мэдэрһэн, ойлгоһон байха. Мүнөө харахадам, бүришье энэрхы болоһон шэнгил даа.
Мүнөө үеын ажаһуудалай шэрүүн долгиндо нэшэгдэнгүй, энэ һургуулида элүүр, садхалан, эрдэм бэлигэй үргэн замаар ургажа, һуража ябаһан һурагша золтой.
- Һургуулиимнай эдэй һуури гээгдэнги гэхээр. Һургуулиингаа, интернадайнгаа байшангуудые өөһэдынгөөл хүсөөр заһабарилаабди. Мүнгэн, арга боломжо дуталдана. Тиибэшье һуралсалай жэлдэ бэлдээбди. Һуралсалай болон хүмүүжүүлгын орёо асуудалнуудые сагай эрилтэдэ зохилдуулаан, шэнэ онол аргануудые хэрэглэжэ бэелүүлхые оролдонобди,- гэжэ Ж. Б. Санжиев хэлээ һэн.
Буряад арадай урдаа хараха ерээдүйн найдал- энэл һургуули, һурагшадынь гээшэ гэжэ хүн бүхэн мэдэдэг. Тиимэһээ зэндэмэни шэнги энээхэн һургуулидаа саг үргэлжэ туһалжа байха ёһотой бэзэ. Дээдын захиргаан хараадаа, анхаралдаа абаха, туһалха, дэмжэхэ гээд найдая. Яхадай хүтэлбэрилэгшэд бэлигтэй һурагшадай хаанашье һурахада, дэмжэдэг туһалдаг гэжэ мэдэнэбди.
Манай нютагай үхибүүд тиимэ анхарал доро байгаа һаа, Агван Доржиевууд, Гомбожап Цыбиковүүд ургажа гарахань лабтай.
2000
127