Баалын зүрхэн тарни « Ом ма ни бад мэ хум » һургуулида хабаатай бүхы зоной: багшанарай, һурагшадай арюун замтай ябахынь тула уншажа ябахыень үреэгээд, сая түхэриг мүнгэ бэлэг бариба.
« Хараасгай » сэтгүүлэй ахамад хинан тохёолдогшо Жимбиев Ц. А. 50 хэһэг сэтгүүлэй захил бэлэглэбэ.
« Ариг Ус » үйлдэбэриин түлөөлэгшэ Романова М. Н. үнгэтэ телевизор бэлэглэбэ. « Наш дом » гэдэг акционернэ бүлгэм 5 сая түхэригэй заһабарилга-барилгын ажал энэ һургуулида хэлсэхэбди гээд мэдүүлбэ.
Яруунын аймагай захиргаанай түлөөлэгшэ, 1976 ондо энэ һургуули дүүргэгшэ Зундуев Ц. Д. үнгэтэ телевизор, 1 сая түхэриг бариба.
1967 ондо дүүргэһэн һурагшадай зүгһөө, эрдэм һуралсалай һайдай орлогшо Раднаева Е. Б. урин дулаахан амаршалгын үгэ хэлэжэ, бэлэг болгон, үнгэтэ телевизор барюулба.
1978 ондо һургуули дүүргэгшэд видеомагнитофон бэлэглэхэ байһанаа мэдүүлээ. Сэлэнгын аймагай һониной хинан тохёолдогшо Намсараев Н. Д. түрэл һургуулиингаа түүхэ бэшэжэ, ном болгон хэблэжэ гаргаха тухайгаа хэлэбэ.
« Бидэ, 1958 оной һурагшад, Хөөлэнтиин нуурай эрьедэ ажалай болон амаралтын зуһалан эмхидхэжэ, түрүүшын гадаһа зооһон байнабди. Мүнөө сагайнь байдал хаража үзэхэдэ, байра байдалынь нилээд хуушарһан, шэнэ барилганууд үсөөн, һэльбэхэ, заһахаар юумэн ехэ гэжэ ажаглахаар. Тиимэһээ түрэл һургуулидаа туһалхабди гэжэ мэдүүлээд, 2 хони, мүнгэн бэлэг баринабди »,— гэжэ мэдүүлбэд.
Үнэхөөрөө анхандаа үхибүүд ябаһан үень, Хөөлэнтиин нуурта шунгажа, өөһэдынь гараар ургуулһан алим жэмэс, охотыннгоо эдеэ эдижэ, Хара далайн эрьедэхи шэнги байгаалитай зуһалантаа амаржа, ажалай дүршэл олгоһон багшанартаяа бухэли зундаа 5— 6 жэл соо үдэһэн, һураһан гуламтань хэды һайхан бэ, хэлэшэгүй, юунтэйшье жэшээлэшэгүйл. Мүнөө эдэ нүхэднай далияа ургажа, бэень хүдэржэнхэй, томоотой, тулгатай улад болонхой тула түрэл һургуулидаа туһалхань дамжаггүй байха гэжэ найдаял.
Мухар Шэбэрэй аймагай Суулгын зайһан Бальжиров Л. Д. трактор бэлэг бариба. Мүнөө сагта хэды зэргэ сэнтэй бэлэг бэ гэжэ бултал ойлгоо бэзэбди.
Агын тойрогой Хүнхэр нютагһаа ерэһэн айлшан үреэлэй һайхан үгэнүүдые хэлэхэ зуураа, 1 хони, мүнгэ бэлэглэхэдээ, « 1 хонинтнай үдэжэ, 70 мянга гаран болог лэ » гэхэдэнь, нэрьемэ альга ташалган болоо. Ушарынь, басаганиинь тайзан дээрэ « Будамшууда » Пиглайн дүрэ наадажа, Һорниитоёо далан мянга гаран хонидтой болоё гэжэ Бурхандаа мүргэжэ, хатар наадахадань, сугларагшад бишыхан зүжэгшэдые тон халуунаар угтаа юм. Найруулагшань соёлой габьяата хүдэлмэрилэгшэ Санжимитыпова Е. Я. айлшадтаа шэхэнэй шэмэг, сээжын баяр бэлэглээ. Сэнхир экрандашье хаража баясаа һэмди.
Удаа дараа жэлнүүдтэ һургуулияа дүүргэгшэдэй үнэтэй бэлэг сэлэг үреэлэй һайхан үгэнүүдтэйгээр надхама баглаа һайхан сэсэгүүдтэйгээр барюулагдажал байгаа һэн. Бултыень хүсэжэ нэрлэхэ, тоолохын аргагүй.
Энэ ехэ баярые шэмэг болгоһон урлалай 8-дахи һургуулиин һурагшадай бүжэг хаража, сэдьхэлээ баясан, урмашан һуубабди.
106