хабаадалсадаг һайхан заншалтай болонхой. Сагаан һарын һайндэртэ нэгэшье һурагша, багша хабаадангүй үлэдэггүй байһаниинъ баясамаар. Гэхэ зуура урдань ибээн тэдхэгшэд яһалал олдодог һэн.
Бэрхэшээлэй олоншье һаа, зоригоо моходоггүй, буянтай ажалнай бүтэхэл байха гэжэ найданабди.
Манай һургуулида заншалта болоһон гэхээр ангиһаа гадуур хэгдэдэг, мүнөө жэлдэ хараалагдаһан ажал гэхэдэ, эрдэмэй дадалгын бага хурал( конференция)(« Минии уг гарбал » гэһэн сэдэбдэ зорюулагдаһан) үнгэргэгдэхэ юм.
1994 ондо түрүүшынхиеэ олон эрдэмтэд, түрэлхид, һурагшадай, хотын һургуулинуудай багшанарай хабаадалгатайгаар иимэ бага хурал үнгэргэһэн байнабди. Мүнөө жэл баһал ехэ үргэнөөр тэрэнээ үнгэргэхэ хараа бодол бии. Энэ ажал хадаа һурагшадай өөрынгөө уг гарбалые 7-8 үе хүрэтэр мэдэхэ болохоһоо гадна, түрэһэн орон нютагаа, түрэлхидөө һайнаар мэдэжэ, сэгнэжэ шадаха болохо горитой хүмүүжүүлгын удхатай ажал болоно гэжэ булта ойлгообди. Мүн хэлэ хүгжөөхэ талаар ехэхэн ажал хэгдэнэ гээшэ.
Һаяхан « Буряад үнэндэ » Ц. Жимбиевэй « Хориин 11 эсэгын уг изагуур » тухай һонин зүйл гаража, маниие баясуулба. Зохёолшондо багшанарһаа сэдьхэлэй баяр хүргэнэбди.
Хэшээлһээ гадуур хүмүүжүүлгын удхатай ажал гээшэ һургуулида тон гүнзэгы удха шанартайнь хэлэшэгүй. Жэшээнь, үнгэрһэн һуралсалай жэлдэ шүлэгшэн Н. Шабаевай « Энхэрэл » гэһэн номтойнь танилсажа, Зохёолшонтайнь хани халуун, мартагдашагүй уулзалга болоо бэлэй. Һурагшаднай зохёолшонай һайхан дуунуудые сээжэлдэжэ, бэлэг болгон гүйсэдхөө һэн. Үхибүүн ябахадаа, һонин намтартай хүнүүдтэй уулзаһандаа, хөөрэһыень наһандаа хадуужа абана ха юм.
Һурагшадай хараа бодолой бүрилдэхэ ябадалда аха нүхэдэй дүрэ шарай, ажалайнь арюун зам хэды һайн нүлөө үгэдэг гээшэб.
Үнгэрэгшэ жэлдэ хэблэгдэн гараһан Ц. Номтоевой шагай наадан, буряад арадай наадан, ёһо заншал, ажаһуудал тухай түүхэ багшын ажалда хэды ехэ туһатайб.
Шүлэгшэн Дулгар Доржиевагай « Эжыдээ бэлэг » гэһэн шүлэгүүдэй согсолбори ном дотор хүдөө нютагуудай үхибүүдэй ажаһуудал, эжы, абаяа хүндэлһэн энэрхы мэдэрэл тухай зохёолшонай уян нугархай хэлээр бэшэһэниинь һонин юм.
Цыренжаб Бадмаевай « Түрүүшын бухал » гэһэн багашуулда зорюулагдаһан ном доторхи шүлэгүүдэйнь үгэнүүд хурдан онобшотойгоор зохёогдоһон байна. Һурагшадай хэлэ хүгжөөлгэдэ ехэл үүргэтэй номууд.
Багшанарай ажалдаа зүбөөр тэдэниие хэрэглэжэ шадабал, ехэл туһатай байха гэжэ тоолоноб.
Багшын ажал гээшэ шэрэнги ойн хүрьһэн сооһоо шүрэ зэндэмэни бэдэрһэн шэнги уран зохёолнуудай далай соо һурагшадайнгаа сэдьхэлдэ сэнтэйхэн бодол үгэмөөр үгэнүүдые бэдэрхын, олохын ашаар амжалта туйланабди гэжэл һанадаг хүм.
Буряад хэлэеэ хүгжөөхын, бадаруулхын тула һургуулинуудта ехэл ажал хэгдэхэ ёһотой гэжэ булта мэдэнэбди. Хотымнай һургуулинуудта бэлигтэй, дүршэлтэй олон багшанар ажалладаг. Тэдэнэрэй абдараа уудалжа, залуу багшанартаяа дүй дүршэлөөрөө хубаалдадаг, « Үнэнэйнгөө » нюураар уулзадаг һаань, ехэл һайн һэн.
104