Мүн тус һургуули дүүргэһэн хүбүүд, басагад бүхы наһандаа тон дүтын хани нүхэд болодог юм. Хэдышье үндэр тушаалтад болобол, түрэл һургуулидаа ерэлгэтэйл байдаг: үхибүүд шэнгеэр багшанартаяа уулзадаг. Сүлөө сагтаа һургуулиингаа зуһаланда сугларжа, Хөөлэнтиин нуурта шунгажа, үнгэрһэн үхибүүн наһаяа дурсадаг һайхан заншалтай.
Урданайнгаа ёһо заншалые, буряад хэлэеэ хүгжөөхэ талаар буряадаймнай радио, телевидениин тон ехэ ажал ябуулдагынь һайшаалтай. « Буряад орон », « Сагай хүрдэ », « Мүнхэ зула » гэһэн дамжуулганууд бултанда хүлеэгдэдэг болонхой. Ульгам нугархай буряад хэлээрээ хүнэй сэдьхэл хүдэлгэмөөр хөөрэжэ байдаг бэлигтэй хинан тохёолдогшонууд Баяр Дамбаринчинов, Дарима Жамсоева гэгшэдтэ харагшадай зүгһөө баяр хүргэе. Хэды һонин дамжуулгануудые хэжэ, Буряад оронойнгоо солото хүнүүдэй ажал хэрэг, эм домто аршаан булагуудай аша туһа тухай хөөрэнэд бэ. Жэшээнь, Захааминай аймагай Енгорбой нютагта элдэб үбшэндэ туһатай аршаанууд, Хориин аймагай Ашангада олон янзын аршаангууд бии юм байна гэжэ хаража, дуулажа байхада ехэл һайн.
Нютагаймни эрхим басагадай нэгэн Будаханда Дагбаевагай радиогоор « Үсэгэлдэр, мүнөөдэр, үглөөдэр » гэһэн дамжуулга эмхидхэжэ, шагнагшадтаа хөөрэхэдэнь һанадагби: « буряад хэлэмнай ямар һайхан, нугархай, ирагуу хүгжэм шэнги хэлэн гээшэб. Хүндэтэ уншагшадни, зорилгоһоо хадуураа гэжэ бү шүүмжэлээрэйгты. Тогтоһон зүйлнүүдни бултал буряад хэлэнэймнай хүгжэлтэдэ, хабаатай байха.
Һүүлэй хэдэн жэлэй туршада Сагаан һарын һайндэрые эмхидхэжэ, Буряадаймнай түлөөлэгшэд нютаг бүхэнһөө ниислэл хотодоо сугларжа, бүхы буряад арадайнгаа анхан сагһаа абажа ябаһан оюун бэлиг, уран мэргэжэлээ харуулха аргатай болонхой. Буряад арадайнгаа абажа, сахижа ябаһан гоё зүүдхэл, хубсаһан, эдеэнэй дээжэ, үреэл, магтаал үгэнүүд жэлэй эхиндэ зэдэлжэ, арад зоноо зоригжуулна, баясуулна.
Энэ ехэ дэмбэрэлтэй ажал ябуулга ББҮСЭ( ВАРК)-ын юрэнхылэгшэ Бато Баяртуевай хүтэлбэри доро үнгэргэгдэдэг гэжэ мэдэнэбди. Энэ ехэ ажал хадаа буряад зоноймнай хүгжэлтын тон хэрэгтэй шухала зүйл гээшэ.
Буряад хэлэндэ хотын һурагшадые һургалгада һуралсалай яаман ехэ анхарал табижа, хотын олонхи һургуулинуудта буряад хэлэ заадаг болонхой. Анги бүхэндэ хараалагдаһан номуудшье гаранхай, жэл бүри гаражашье байдаг. Жэлдээ нэгэ дахин олимпиада үнгэргэгдэнэ. Энэ ехэ һайшаалтай. Һурагшадай эдэбхи, анхарал, багшанарай харюусалга бүри дээшэлхэ байна гээшэ.
Энэ талаар манай хотын 19-дэхи һургуулида буряад хэлэнэй багшанар Хазагарова Лидия Базаржаповна шадамар бэрхээр һурагшадайнгаа уг гарбал тухай ехэ зүйлнуудые сбуламлжа, бага хуралнүүдые үнгэргөө.
Шарланова Людмила Шагдаровна, Дашиева Долгорма Намсараевна гэгшэд һурагшадаа ирагуу һайхан буряад дуунуудта һургажа, элдэб һонин зүжэгүүдые һайндэрнүүдтэ табидаг юм.
Иимэрхүү хэшээлһээ гадуур ажал хэгдэжэл байхадань, һурагшадай мэдэсэ үргэн болоно гээшэл даа.
99