ЭХЭ НЮТАГ ХӨӨРХЭМНИ Книга эжи | Page 23

Хабар тээшэ болоходо, сагай уларилалай наашалхада, амитан зон, малшье үеэ
тэнииhэн шэнги бологшо hэн. Хэдышье хүндэ дайнай үеын саг байгаашье hаань,
«мал хараhан – ама тоhодохо» гэжэ урданай зоной хэлсэдэгэй ёhоор, гэдэhээ
үлдэжэ ядаржа ябанабди гэжэ нэгэтэшье hанагша үгы бэлэйбди. Гар тээрмээрээ
орооhоо татаад, талхаараа hүнтэеэ хооллоод ябахадаа, хүн юундэ үлдэхэб даа.
Урданай сагта эртэ дулааржа эхилэгшэ гээшэ hэн ха. Эртүүр ногоон бултайжа,
сагаан сэсэг, ургын ургахада, зуhаланда бууха сагнай дүтэлбэ гэжэ бидэ тэнсэлгүй
баярлагша hэмди. Зуhаламнай Хүсөөтэдэ, хамтын байдалай түбhээ баруун-
урагшаа 2-3 модоной газарта байгша hэн. Тиихэдэ айлнуудта юуншье ехэ бараан
байшахаб даа: урданай үхэг, ханза, шэрээ гэхэ мэтэ бараагаа нэгэ тэргэдэ ашаад,
үнеэ тугалаа туугаад, тооротой(поросёнок) hаа, хүнэгтэй эдеэгээр дахуулаад,
хамтын байдалайнгаа түбэй хойгуур баруулжаа зөөжэ ябахадамнай, зон хараhан
hайт. Энээнhээ ехэ жаргал үхибүүн ябахада үгы hэн даа.
Зуhаландаа ерэхэдэмнай, бууса хорёогоймнай газаагуур үрмэдэhэ, ногоон
ургашанхай, баруун горхомнай шааяса урдашанхай, зүүн тээлниг соо набша
ногоон, үнгын сэсэг, шубуу шонхорой дуу дорьбоон, манhаа урид ерэжэ, гэрэй
армагуудта уурхайгаа заhажа түбхинэhэн хараасгайнууд баhал баярлаhан шэнги,
үрхөөр ороон гараан хүл хөөрсэг боложо байха.
…Yбhэндэ орохын урда баhал амар заяа үзэхэ аргагүй хорой, тээлниг hэльбэжэ
барилган болоходонь, үнеэдэй хоёр hаамай хоорондо эжынэрнай үглөөнhөө
үдэшэ болотор ябашахал даа. Бидэ нарай тугалнуудтаа хүнэг соо горхонhоо уhа
асаржа үгэхэбди, Баатарай хорёогой ногоонhоо сабшажа, мэшээгээр асаржа
үгэхэбди. Yдэшэлэн тээлниг соогуур бэлшэжэ ябаhан тугалнуудаа суглуулжа,
унай табиhаар байтарнай, үдэшын үнеэ hаалганай үе боложо, бэлшээриhээ
hаамхай үнеэднай дэлэнгээ даажа ядаhан, hадархай хүхэнүүдынь шэжэгэнэсэ
hүеэ гоожуулhаар, хорёодоо хүрэжэ ядажа ерэхэдэл гэхэ.
Жалсанай Цэрэтэр гэжэ шара-улаахан сэбэрхэн шарайтай шамбайхан эхэнэртэй
зэргэлэн хорёо соо үнеэдээ hаахабди. Хадам эжынь, Машанай эжы, бэриингээ
үдэрэй ажалhаа ерэтэр, олонхи үнеэдыень hаажархиха. Би үшөөл ахирхан ябааб
даа. Ехэ тугалдаа диилдэн алдахаш. Хатуу хүхэтэй үнеэдэй хүхыень диилэжэ
шобторжо ядахаш. Машанай эжы тулихыем харахадаа, долёобор дунда хурган
хоёройнгоо хоорондо hалаагайнь забhараар hаагыш, тиихэдэш эрхы хурганшни
долёобороо дүнгэлсэхэдөө, хүсэтэй болохо гэжэ заажа үгэхэдэнь, нээрээшье,
үнеэдээ диилэнхииень тордиhогүй hаадаг шахуу болобоб.
Yдэшэ харанхы болохоhоо нааша эжынэрнай ерэжэ, үнеэдээ hааха даа. Теэд
hааhан hүеэ тушаагаад, амаржа унтадаг hэн юм даа. Бүхэли hүниндөө hаалин
гэр соо ээлжээгээр тэрэ ехэ hүеэ машинадажа гараха. Һүүлээрнь зөөхэйгөө үндэр
ехэнүүд hабанууд соо бүлэжэ, тоhон болгохо, иилгэдэhэнhээнь илгажа, хэдэн
дахин уhаар угаажа, монсогор монсогороор сохижо, торхо соо хэжэ суглуулаад,
аймагай түб тушаагша бэлэй даа. Хэды багтаа унтажа амардаг барhад байгаа
гээшэб? Мүнөөнэйхидэл элбэг хубсаhан хаана байхаб даа. Зунай утын бороо
болошоходо, hэлгэхэш юумэн олдохоёо болишодог гээшэ hэн ха. Бидэ, үхибүүд,
ехэнхи ушарта хүл нюсэгөөр ябагша hэмди. Дааражаш ябаhанаа hанагшагүйб.
Ямар хүсэл зоригоор бэенхэдэнхэй ажаллажа ябаhан баатарлиг эжынэрнай!
25