“ Ons was hoofsaaklik wyndruiweprodusente wat ook met groente geboer het, maar die druk waaronder die wynbedryf staan en stagnerende wynpryse het gemaak dat ek na alternatiewe gewasse begin kyk het wat meer waarde tot my beskikbare besproeiingswater kan toevoeg.”
Hy sê wingerde bly’ n besonder geharde gewas. Van sy blokke teen die rivier is feitlik elke winter onder water en tydens die onlangse vloede het die water op plekke tot 5 m bo die wingerde gestyg. Wanneer die water afloop, groei die wingerde eenvoudig verder. Tog verhoog die groot aantal wingerde in die streek ook die siektedruk.
Met appelkose en makadamias is die leerkurwe groter. Daar is min makadamiaprodusente in die omgewing en die bedryf is volgens hom taamlik geslote. Hy moet dus grootliks self leer namate hy aangaan.