Entrepreneurskap
TACO-KOMBI –
entrepreneurskap op wiele
Artikel: Helena Goosen
Foto’s: Valjean Joubert
T
oe Valjean Joubert en sy vrou, Christine, in 2009 op ’n
werksvakansie van drie maande in Kalifornië was, het
hulle verknog geraak aan die Meksikaanse eetkultuur,
veral in die suide van dié staat. Die smullekker, gesonde
koskombinasies het hulle oortuig alle Meksikaanse
disse is nie skroeiwarm konkoksies wat jou sluk verbrand en jou oë
laat traan nie.
Die egpaar het begin droom oor ’n voedsame Meksikaanse
eetstyl in Suid-Afrika met sy reënboogspektrum van kleure,
geure en smake. In die besigheidshart van New York het die idee
aan ’n eetwa op wiele in hul tuisland toe vlam gevat. Weens hul
veeleisende beroepe kon hulle egter eers drie jaar later dié konsep
verder uitbou.
Mense raak deesdae uitgekuier by restaurante en die gewone
kitskos-venues, meen Valjean, en soek afwisseling. In die VSA is
daar meer as 12 000 voedseltrokke wat kos na klante neem en
’n wye keuse van spyse bied. Dié mark is in Suid-Afrika grootliks
onontgin.
Terug in Pretoria het Valjean buite die boks gedink om ’n
splinternuwe nis in die plaaslike spyseniersbedryf te ontgin –
maaltye op wiele. En waar kry jy ’n voortrefliker voedselvoertuig as
die alombekende en volop teenwoordige kombi in Suid-Afrika met
sy kleurryke bussie-kultuur.
Valjean het toe afgeleefde kombi’s van die wrakwerf gered
en hulle vernuftig in sy agterplaas omskep in doelgemaakte,
funksionele koswaentjies. Elke kosmobiel is volledig toegerus
om warm en koue eet- en drinkgoed via ’n bedieningsluik cum
afslaanblad te verskaf.
Elkeen spog met ’n eie persoonlikheid: Raoule, getooi in
rissierooi, Eduardo wat pronk met bloubul-aksente, Hernandez
in raaksien-oranje en hul Stellenbosse neef, Fernando, wat
deesdae uithang in eikegroen. Dié knap entrepreneur en sy
medebestuurders neem hul kombi’s gereeld na Saterdag-markte in
Pretoria. Hulle doen ook spyseniering vir spesiale geleenthede.
Die kombi’s is van vroegdag tot laataand beskikbaar om keurige,
kraakvars Meksikaanse taco-geregte op jou drumpel te lewer –
elke porsie knussies verpak in ’n tortilla (pannekoekomhulsel). ’n
Wye keuse van speserye en salsas (souse) verseker ’n liplek-lekker
smaaksensasie vir elke klant. Waagmoediges kan selfs ’n knertsie
van die berugte vuurwarm habanero-rissiesous probeer!
Selnommer: 083 333 5633
e-pos: [email protected]
Webwerf: www.tacokombi.co.za
Maart/April 2016 / March/April 2016
Oos
East
lans
lam
Oos
lans
13