drama
Dramatiese Kunste is nie net om ’ n paar woorde op te sê nie Erica Dreyer
As iemand vir jou vra watter vakke jy neem en jy gee die antwoord : Drama , dink hulle dat dit ’ n maklike vak is waar jy net rondspring en ’ n paar woorde hoef op te sê . Ek wil graag poog om daardie mense se siening te verander .
Hierdie vak is soveel meer as net ’ n paar woorde opsê . Dit bevat ’ n groot klomp teorie waaroor jy eksamen moet skryf . Die werk behels dat jy ’ n klomp verskillende soorte teaterstyle van drama leer . ’ n Mens leer oor die drama wat handel oor teater en drama van al die antieke Grieke , van die jare voor Christus tot Gestroopte en Epiese teater van die apartheidsjare . ’ n Mens leer nie net oor die teaterstyle nie , maar ook oor die sosio-politieke omstandighede van die teaterstyle en die tydperke daarvan .
Dit laat jou toe om op ’ n ander manier te dink , om met ander te werk , jouself te wees , om uit jou boksie uit te klim en jouself voor ander mense te kan uitdruk .
Ek het ’ n paar matrieks gevra om hulle ervaring te deel :
“ Drama help jou die wêreld op ’ n dieper manier sien en jy vind jouself en leer om jouself op verskillende maniere uit te beeld .” - Simone Brenkman
“ In die Dramaklas is ons nie net leerders nie ; ons is ’ n gesin wat mekaar ondersteun . Dit maak deure oop wat jou as mens laat groei . Dit maak jou van dinge van die verlede asook die hede bewus . Dit dien as insig op ’ n prentjie van die wêreld en net soos jy dink jy weet wat aangaan , trek dit jou in en jy word deel van die groter prentjie . Ook van die leefstyl wat jou uniekheid laat blom .” -Maurilize Geyer
“ Drama is baie werk , veral die teorie . Maar ons word beloon deur om in elke 9-dag-siklus twee periodes vir praktiese oefeninge te kry . Ons bou karakters van kop tot toon en toneelstukke wat abstrak of realisties kan wees . Dit gee ons ook die geleentheid om in iemand anders se skoene te loop en hulle gevoelens te ervaar .” - Payton Syse
Drama is ’ n groot deel van die kunstewêreld en as dit nie daarvoor was nie , sou Hollywood nie flieks kon maak nie , Disney World sou nie bestaan nie en daar sou eenvoudig nie televisies in ons huise gewees het nie . Die meeste mense dink Dramatiese Kunste is net ’ n vak en net ’ n paar woorde wat jy op ’ n verhoog moet opsê . Dit is soveel meer , soos die leser hierbo kan sien .
Het julle ‘ Akkapella-groep ’ gesê ? Deur Corné Vosloo
Onder leiding van ds . Van der Walt word daar hard gewerk om ' n seuns Akkapella- sanggroep te stig . Die seuns het al ' n paar oefeninge gehad waar hulle begin om musiek te sif wat hulle moontlik sal kan gebruik . Dit lyk na ' n belowende groep seuns wat almal baie opgewonde is om die sanggroep by die beplanningsfase verby te kry sodat hulle uit volle bors kan begin sing .
Die stemme word getoets en ook watter instrumente hulle daarmee saam sal kan gebruik om reg te laat geskied aan die kwaliteit van sang wat hulle wil lewer .
Die belangstelling vir die sanggroep is oor al die grade versprei . Ons hoop dat daar wel ' n toekoms vir die sanggroep by ons skool sal wees en dat dit nie met ander kultuur-aktiwiteite sal bots nie .
Nou kan ons nie wag vir die eerste keer dat ons die groep sal hoor sing nie . Die seuns sal ' n heel ander atmosfeer skep met hulle stemme as wat ' n gemengde koor of slegs meisiekoor sal doen . Dit wys net tot watter diversiteit ons by Grens gaan . Warm op die stemme , manne en laat die klanke rol !