Ռուբեն Մալայան Նկարիչ , դիզայներ
Մի մարդ , ով անմիջական պատասխանատվություն է կրում Երևանի սարսափելի վիճակի համար , ով տարիներ շարունակ մեթոդիկ աշխատել է , որպեսզի քաղաքը դառնա աներես և ավելի շատ նմանվի անճաշակ shopping mall-ի , մարդ , ով շարունակական ձևով վերացրել է Թամանյանի թողած ժառանգությունը , անտեսել է քաղաքում ապրող մարդկանց տարրական պահանջները , այդ մարդուն ես չեմ վստահի գյուղի գոմի տանիքի գույն որոշելը , ուր մնաց այդպիսի հարցերի լուծումը :
Սաշուր Քալաշյան ՀՀ վաստակավոր ճարտարապետ , ՀԽՍՀ վաստակավոր ճարտարապետ
Քաղաքակիրթ երկրներում այս օրենքը պարտադիր է : Քաղաքաշինությունը յուրահատուկ ոլորտ է , որովհետև քաղաքը ո ՛ չ ճարտարապետի սեփականությունն է , ո ՛ չ էլ պատվիրատուի , ով որոշել է ինչ-որ օբյեկտ կառուցել : Օբյեկտն , անշուշտ , պատկանում է սեփականատիրոջը , բայց այն կառուցվում է միջավայրի մեջ , որը բոլորինն է : Հենց այդ պատճառով էլ կառույցը վերջնական կառուցելուց հետո սեփականատերն իրավունք չունի փոփոխություն անել կառույցի ճակատային հատվածում ՝ առանց հանրային քննարկման , քանի որ այդ փոփոխությունից փոխվելու է նաև միջավայրը : Սա ամբողջ աշխարհում ընդունված կարգ է : Ես կողմ եմ , որ այդ նախագիծը ընդունվի և գործի , որովհետև ճարտարապետի միակ նպատակը ամուր շինություն կառուցելը չէ , ճարատարապետը նաև խնդիր ունի կառուցելու ճարտարապետական գեղագիտական մնայուն արժեքներ : Խնդիրը այլ է : Նման օրենքներ նախկինում էլ ընդունվել են , բայց դրանք չեն պահպանվել , որովհետև մենք օրենք պահել չենք սիրում :