Editorial
EDITORIAL
Ban
Na produkto i servisio ku nos ta bende i kumpra
PONE
STANDART
E edishon aki di Konsumidó Alertá lo ta den lus di siman di Kultura i Turismo. Kada aña e siman aki ta keda yená ku diferente aktividat organisá pa gobièrnu i otro organisashonnan. Promoshon di nos kultura i tambe nos turismo ta e meta prinsipal di e siman aki. Den nos sekshon di notisia nos tin un artíkulo den kua nos ta pone atenshon na e tema aki.
Fundashon pa Konsumidó tambe ta hasi su aporte pa hisa kalidat di turismo na nos isla. Turistanan ku ta bishita nos dushi isla tambe ta kumpra i hasiendo esaki nan tambe ta konsumidó. Na momentu ku un turista kumpra un produkto òf servisio riba nos isla pa despues regresá su pais, loke e kumpra ta kai bou di reglanan di protekshon di konsumidó riba nos isla. En bista di e oumentu di bishitantenan turístiko, nos fundashon ta ripará tambe ku mas turista, ku tin keho ta haña e kaminda pa yega seka Fundashon pa Konsumidó dado kaso e tin un keho. Den pasado hopi di e kehonan tabata drenta via nos ofisina di turismo, pero mas i mas turistanan ta yega na nos direktamente via entre otro nos wèpsait i Facebook.
Esaki ta un desaroyo ku nos ta aploudí i lo bai intensivá informashon pa asina, den kaso di un keho, e turista sa ku e por aserká nos.
E intenshon ta pa nos bai dediká mas atenshon na duna informashon tokante derechi di konsumidó na turistanan ku bishitá òf tin plan pa bishitá nos isla. Tambe splika kiko ta e proseduranan ku Fundashon pa Konsumidó ta tene su mes na dje na momentu di intermediashon. Tur esaki den kuadro di nos leinan di protekshon di konsumidó. Den kuadro aki Fundashon pa Konsumidó ta partisipando tambe den un enkuesta di Hague Conference on Private International Law (HCCH) ku meramente ta investigando e kumbiniensia i viabilidat di mas koperashon internashonal riba e área di protekshon di derechinan di konsumidó di e turista òf bishitante di eksterior.
Aki na Kòrsou, nos fundashon lo buska tambe kolaborashon ku otro aktornan riba e área di turismo pa asina pone atenshon na e tema aki i duna e turista bishitante e protekshon ku e tin derechi riba dje pa asina, hasta si algu bai robes den kualke kompra, e lo keda e ambasador ku nos ke pa kada bishitante di nos dushi isla ta.
Marc Marshall
Direktor