INTERMEDIO
A base di nos investigashon nos a bin komprondé ku e akshon ya menshoná di Digicel ta algu ku e kompania a tuma pa hinter nos área di Karibe. Argumento di e kompania Digicel ta ku e aplikashonnan ku ta duna e servisio pa yama ku Voip ta ilegal i no ta pagando e provedó komo esun ku a invertí den e ret mobil. E pregunta ku ta surgi ta, Digicel por tuma e akshon aki?
Laga nos sali for di punto di bista ku Digicel tin rason pa blòkia aplikashonnan ku nan ta haña ilegal. Dor di e blokeo aki Digicel ta kambia un parti esensial di e kontrakt ku e tin ku konsumidónan ku a sera un kontrato ku Digicel. Pa lei e kompania mester avisá su klientenan di e kambio adelantá i riba un término aseptabel pa e kliente por tuma akshonnan nesesario.
Mas importante ainda ta ku Digicel mester duna kada kliente e oportunidat di kanselá su kontrakt a base di e kambio di e kondishonnan di e servisio. Te asina leu ku informashonnan risibí pa Fundashon pa Konsumidó, esaki no a sosodé. De fakto kada kliente di Digicel tin e derechi si stòp nan kontrakt ku Digicel i bai na un otro kompania ku no ta blòkia sierto akseso na internèt.
Pero di bèrdat Digicel por blòkia akseso na sierto aplikashonnan di bo pakete di data ku bo a kumpra? Den pasado nos a mira ku kompanianan di telekomunikashon ta bende paketenan di internèt ku diferente akseso limitá. Paketenan spesífiko manera di Blackberry ku akseso na solamente wèpsaitnan soshal manera Facebook i Blackberry Messenger. Kondishonnan di e paketenan aki ta keda indiká adelantá i un konsumidó sa di antemano kiko e ta kumpra pa kuantu sèn. Pero si komo provedó, bo ta bende un pakete di internèt ku akseso kompleto na internèt, esei ta loke e kliente ta spera di haña.
Ku awor a bira posibel pa hasi yamada via bo data di internèt i e kompania di telekomunikashon ta keda afektá dor di esaki no ta un problema di e konsumidó. Den esaki, kompanianan di telekomunikashon mester grawatá tras di nan kabes i puntra dikon nan no a adaptá nan servisionan riba desaroyonan nobo riba e merkado di telekomunikashon.
UN NOTISIA ALARMANTE A YEGA NA OREA DI FUNDASHON PA KONSUMIDÓ DEN KUA KONSUMIDÓNAN TA REKLAMÁ KU NAN PROVEDÓ DIGICEL DI UN DIA PA OTRO A BLÒKIA AKSESO NA SIERTO APLIKASHONNAN RIBA INTERNÈT. TA TRATA DEN E KASO SPESÍFIKO AKI DI APLIKASHONNAN KU TA KEDA UZÁ PA HASI YAMADANAN VIA E PROTOKÒL KU YAMA VOIP. VOIP (VOICE OVER INTERNET PROTOCOL) TA HASI POSIBEL PA BO PAPIA VIA INTERNÈT SIN HASI UZO DI BO MINÜTNAN PA BÈL YA KU E YAMADA TA PASA VIA BO DATA (MOBIL ÒF WIFI). HOPI DI NOS KONOSÉ APLIKASHONNAN MANERA SKYPE KU TA TRAHA A BASE DI E SISTEMA AKI. AWENDIA TIN HOPI MAS APLIKASHON KU TA OFRESÉ E SERVISIO AKI MANERA VIBER, TANGO, LINE, VONAGE, GOOGLE+ HANGOUTS, UPPTALK, VYKE, KAKAO TALK, PHONE FOR GOOGLE, BOLT, ZOIPER, TELLPE I MUCHU MAS..