Suid-Afrika se somergewasvooruitsigte het verder verbeter, met rekordoeste wat vir kommersiële mielies en sojabone verwag word. Die Oesskattingskomitee se vierde produksieskatting vir 2026 wys ook’ n sterk herstel in sonneblomproduksie, hoewel die prentjie vir geelmielies, grondbone en droëbone minder gunstig lyk.
Die skatting is op huidige toestande gegrond en aanvaar dat die res van die produksieseisoen normaal sal verloop.
Grootste mielie-oes op rekord
Die verwagte kommersiële mielie-oes is op 17,06 miljoen ton gestel. Dit is 228 940 ton, oftewel 1,36 %, meer as die vorige skatting en 2,03 % groter as die finale oes van 2025. Volgens die Oesskattingskomitee sal dit die grootste kommersiële mielie-oes op rekord wees.
Altesaam 2,72 miljoen ha is gedurende die 2025 / 26- produksieseisoen onder mielies aangeplant. Die gemiddelde opbrengs word op 6,28 t / ha geraam.
Die Vrystaat, Mpumalanga en Noordwes sal na verwagting saam ongeveer 82 % van die kommersiële mielie-oes lewer.
Wanneer nie-kommersiële produksie bygereken word, kan Suid-Afrika se totale mielie-oes ongeveer 17,76 miljoen ton beloop.