84
Pellegrinaġġ Parrokkjali
fl-Art Imqaddsa
connie rapa
Fis-sigħat bikrin tal-1 ta’ Awwissu tas-sena l-oħra (2019)
grupp ta’ 52 persuna, kważi kollha mix-Xewkija, iltqajna
fil-pjazza tar-raħal biex flimkien mal-Arċipriet Dun
Daniel Xerri u Fr Twanny Chirchop OFM bdejna vjaġġ,
jew aħjar pellegrinaġġ ta’ disat ijiem fl-Art Imqaddsa.
Fl-Art Imqaddsa nsibu postijiet sagri mhux biss għall-
Kattoliċi iżda wkoll għal-Lhud u għall-Musulmani. Iżda
għalina l-Insara dan il-post għandu sinifikat partikolari
ħafna, għaliex fih seħħew il-ġrajjiet li naqraw fil-
Bibbja, speċjalment dawk tat-Testment il-Ġdid, jiġifieri
t-twelid ta’ Kristu f’Betlehem, it-trobbija u l-ħajja tiegħu
f’Nazaret, il-bidu tal-ministeru tiegħu ħdejn il-Baħar tal-
Galilija - fejn xandar il-kelma ta’ Alla u għamel il-mirakli,
sal-passjoni, il-mewt u l-qawmien mill-mewt tiegħu
f’Ġerusalemm.
Mal-wasla tagħna fl-ajruport ta’ Ben Gurion f’Tel Aviv
Iżrael qbadna t-triq lejn il-Belt ta’ Haifa fejn fuq l-Għolja
tal-Karmelu nsibu l-monasteru u s-santwarju ddedikat
lil Marija, Stella Maris li tagħha hemm statwa sabiħa
fuq l-altar maġġur. Din il-knisja hija mibnija fuq il-kripta
tal-Profeta Elija.
Minn hemm tlaqna lejn Nazaret (01) li llum hija l-belt
ewlenija tal-Galilija imma fi żmien Kristu kien biss
raħal żgħir minsi. Il-lukanda tagħna kienet eżatt ħdejn
il-bażilika tal-Annunzjazzjoni.(02) L-għada filgħodu
bdejna l-ġurnata tagħna f’Nazaret billi ċċelebrajna
l-quddiesa fil-bażilika, fuq l-altar li hemm ħdejn id-dar
tal-Madonna.(03) Kienet emozzjoni kbira niċċelebraw
l-Ewkaristija fil-post fejn Marija qalet ‘Iva’ u l-Iben t’Alla
sar bniedem fil-ġuf tagħha. Wara l-quddiesa komplejna
nżuru l-bażilika tal-Annunzjazzjoni. Din hija maqsuma
fi tnejn. Fil-parti ta’ isfel insibu diversi fdalijiet ta’
mqades u knejjes antiki fosthom altar li jinsab fil-grotta
l-qadima fejn skont it-tradizzjoni kien hemm id-dar
li fiha kienet tgħix Marija u fejn seħħet it-tħabbira
tal-Anġlu Gabrijel. B’kuntrast qawwi mas-sempliċità
tal-parti ta’ isfel, il-parti ta’ fuq tal-bażilika hija mimlija
b’lussu artistiku u fiha ħafna twieqi bi stained glass bi
lwien differenti. Il-koppla ta’ din il-bażilika minn barra
tidher qisha kuruna rjali filwaqt li minn ġewwa tixbaħ
ħafna warda tal-ġilju. Madwar il-bażilika minn barra
hemm portiku li huwa miżgħud bi xbihat tal-Verġni
Marija li ġejjin minn santwarji Marjani minn madwar
id-dinja kollha, fosthom mis-Santwarju tal-Madonna tal-
Mellieħa f’Malta u kif ukoll mużajk sabiħ tal-Madonna ta’
Pinu(04) li ġie inawgurat mill-Isqof ta’ Għawdex Mons.
Mario Grech f’Settembru tal-2018. Filgħaxija kellna
x-xorti nattendu għall-purċissjoni aux flambeaux wara
l-istatwa tal-Madonna, waqt ir-reċta tar-rużarju, b’kull
postha tingħad b’lingwa differenti. Sr Chiara Pace
u s-Seminarista Matthew Attard mill-grupp tagħna
mexxew posta bil-lingwa Maltija. Konna impressjonati
bl-attendenza u l-ħeġġa ta’ ħafna żgħażagħ li animaw
bil-kant tagħhom.
Qrib tal-bażilika żorna wkoll is-Santwarju ta’ San Ġużepp
fejn skont it-tradizzjoni għexet il-familja Mqaddsa wara
li ġiet lura Nazaret mill-Eġittu u li għalhekk kienet id-dar
li fiha trabba u għex Ġesù. Qrib ukoll jinsab il-Mużew
Arkeoloġiku tal-Franġiskani. Hawnhekk wieħed jista’
jifhem aħjar kif kien ir-raħal ta’ Nazaret fi żmien Ġesù u
kif l-għar tal-Annunzjazzjoni kien jagħmel parti minn
dan il-kumpless ta’ kmamar fil-blat, silos għall-qamħ u
ambjenti fejn jinżammu l-bhejjem. Raħal ċkejken ta’ nies
foqra imma ħaddiema, kif kienet il-Familja Mqaddsa ta’
Ġesù, Marija u Ġużeppi. Ftit ’il bogħod mis-Santwarju
tal-Annunzjazzjoni tinsab l-għajn tal-Verġni Marija li
kienet l-unika nixxiegħa tal-ilma fir-raħal ta’ Nazaret,
minn fejn Marija kienet tmur timla l-ilma bħalma kienu
jagħmlu n-nisa l-oħra ta’ Nazaret.
Fil-Galilija, madwar seba’ kilometri ’l bogħod min-
Nazaret, żorna wkoll l-Għolja Tabor fejn hemm bażilika
li tfakkar it-trasfigurazzjoni ta’ Ġesù.(05) Il-bażilika hija
mdawla ħafna u fiha mużajk mill-isbaħ fl-abside li
jirrappreżenta x-xena tat-trasfigurazzjoni u fil-kripta
erba’ mużajċi li jirrappreżentaw it-twelid ta’ Ġesù
f’Betlehem, it-twaqqif tal-Ewkaristija, il-Ħaruf tassagrifiċċju
fuq is-salib u l-qabar vojt. Fi triqitna lura
lejn Nazaret, tlajna fuq l-Għolja tal-Preċipizzju(06) fejn
hu maħsub li n-nies ta’ Nazaret darba ħadu lil Ġesù
biex jitfgħuh għal isfel iżda hu għadda min-nofshom
u baqa’ sejjer. Minn hawn stajna nammiraw il-veduta
spettakolari tal-Galilija li tidher taħt u tal-Wied ta’ Jeżreal.
It-tielet ġurnata kienet iddedikata għall-baħar jew aħjar
l-għadira tal-Galilija. L-ilma tal-Għadira huwa ħelu u ġej