62
Barra minn dan, waqt il-vaganzi tal-Milied, organizzajna
ħarġa għal Malta flimkien mal-abbatini tal-Parroċċa ta’
Kerċem. Morna naraw l-atmosfera sabiħa li kien hemm
fid-daħla tal-Belt Valletta.
IL-COVID-19
Is-sitwazzjoni partikolari li feġġet f’pajjiżna fis-7 ta’ Marzu
wasslet sabiex il-quddies kollu jibda jsir fil-magħluq
u l-laqgħat jintemmu ħesrem. Dan kollu wassal biex
intemmu l-kuntatti ta’ bejnietna. Barra minn hekk
ix-xogħol li kien isir fil-knisja minna l-abbatini waqaf
kompletament.
IL-ĠIMGĦA MQADDSA - LAQGĦAT B’MEZZI TEKNOLOĠIĊI
Il-Ġimgħa Mqaddsa din is-sena kienet waħda
speċjali fejn ma stajniex immorru ngħinu waqt iċċelebrazzjonijiet
li jsiru f’dawn il-ġranet għeżież. Imma
aħna l-abbatini bl-għajnuna tat-teknoloġija moderna
għamilna kuntatti virtwali u filwaqt li qsamna bejnietna
xi ħsibijiet, irreċitajna t-talba sabiħa tal-Via Sagra. Hekk
stajna nitolbu flimkien f’dan iż-żmien diffiċli u uniku.
IL-MIDJA SOĊJALI
Inħeġġukom sabiex iżżommu ruħkom aġġornati fuq dak
kollu li nagħmlu matul is-sena billi ta’ sikwit iżżuru l-paġna
ta’ Facebook tagħna Abbatini Xewkija. Inkunu grati jekk
tħallu xi kummenti kif ukoll tixxerjaw xi materjal li aħna
nippostjaw fuq il-paġna tagħna minn żmien għal ieħor.
GRAZZI... GRAZZI.....GRAZZI
Grazzi kbira lill-ġenituri tagħna l-abbatini li jħeġġuna
kontinwament u jsostnuna sabiex inkomplu nwettqu
l-ħidma tagħna fil-parroċċa b’aktar impenn, dedikazzjoni
u mħabba. Grazzi wkoll lill-Arċipriet, il-kleru u
s-Seminaristi Franklin u Matthew li jakkumpanjawna
fid-diversi impenji li jkollna matul is-sena. Grazzi
lilkom il-parruċċani li tant tħeġġuna, tinkoraġġuna u
tissapportjawna f’dak kollu li nagħmlu. Iżda fl-aħħar
l-akbar grazzi tmur lill-Mulej li għażilna biex naqduh
tant qrib, fuq l-altar.