2
Messaġġ tal-arċipriet Mons. Daniel Xerri
Il-Battista u
d-deżert ta’ ħajjitna
Għeżież,
Is-sena 2020 hija waħda speċjali għalina, għax fiha qed
infakkru l-175 sena mill-miġja fostna tal-istatwa ta’ San
Ġwann Battista. Din kienet inħadmet fl-injam minn
Pietru Pawl Azzopardi fl-1845 u waslet fil-parroċċa
tagħna fit-22 ta’ Ġunju tal-istess sena.
Imma s-sena 2020 ser tibqa’ mfakkra wkoll bħala
waħda partikulari minħabba l-pandemija tal-Covid-19
li ħakmet lid-dinja, inkluż lil pajjiżna. Fil-fatt, kellna
nbiddlu l-programmi kollha li kellna maħsubin għal
din is-sena u biex ngħid hekk, nabbandunaw il-festi
speċjali li konna qed nippreparaw fl-okkażjoni ta’ dan
l-anniversarju speċjali tal-istatwa. Imma dan kollu ma
naqqas xejn mill-fidi tagħna fi Kristu u mill-imħabba
tagħna lejn Ġwanni l-Battista. Anzi, iċ-ċirkustanzi tal-
Covid-19 ġiegħluna nirriflettu u nistaqsu: X’inhu l-aktar
importanti? X’inhu tabilħaqq essenzjali f’ħajjitna u
fil-fidi tagħna? X’inhi l-vera festa?
Għadhom stampati f ’moħħna dawk ix-xeni ta’
toroq u pjazez vojta, speċjalment fl-ewwel xhur talpandemija,
meta kulħadd kien mitlub jibqa’ f’daru
bħala prevenzjoni mit-tixrid tal-virus. Għafsa ta’
qalb kbira kienet tara l-knejjes tagħna magħluqin u
ċ-ċelebrazzjoni tal-quddiesa ssir mis-saċerdot waħdu,
bi knisja vojta. Impressjonanti wkoll kienet dik ix-xena
tas-27 ta’ Marzu li għadda, meta rajna l-Papa Franġisku
tiela’ t-taraġ ta’ Pjazza San Pietru, waħdu, biex imexxi
talba ħerqana quddiem ix-xbieha ta’ Kristu Kurċifiss
u x-xbieha tal-Madonna, taħt ix-xita nieżla, quddiem
pjazza vojta.
Jiena u nirrifletti fuqhom f’dawn il-jiem tal-festa, dawn
ix-xeni jfakkruni ħafna fid-deżert li fih għex għal ħafna
żmien Ġwanni l-Battista. Id-deżert huwa post kbir
immens ta’ vojt u baħħ, bla ebda sinjal ta’ ħajja u bi skiet
li jbeżża’. Għall-poplu t’Alla fl-Antik Testment id-deżert
kien żmien ta’ prova kbira fil-mixja tagħhom lejn l-art
imwiegħda. Fid-deżert il-poplu ltaqa’ ma’ ħafna perikli,
bata l-ġuħ u l-għatx, iltaqa’ mas-sriep velenużi u ħafna
drabi kien ittentat li jitlef il-fidi tiegħu f’Alla. Minħabba
f’hekk mhux l-ewwel darba li l-poplu ħabat jaqta’ qalbu
u beża’ li mhux se jasal. Imma Alla, fil-ħniena tiegħu,
kien mal-poplu tiegħu fid-deżert, baqa’ jimxi miegħu,
jurih it-triq, jipprovdilu dak li jkollu bżonn, jagħtih
il-kmandamenti, jaħfirlu kull meta jeħodha kontrih,
sakemm iwasslu fl-art imwiegħda. Fid-deżert il-poplu
seta’ jara l-għeġubijiet ta’ Alla! Tant li dak li fih innifsu
kien żmien ta’ prova kbira, inbidel fi żmien ta’ namur
bejn Alla u l-poplu tiegħu. Fid-deżert il-poplu rnexxielu
jagħraf kemm Alla jħobbu, kemm hu lest li jaħfirlu,
kemm hu lest li jipprovdilu, kemm hu lest li jagħmel
minn kollox għalih biex isalvah.
Anke għal Ġwanni l-Battista, id-deżert kien ifisser dan
kollu. Kien għalih żmien ta’ prova kbira imma wkoll
żmien ta’ intimità ma’ Alla, żmien ta’ talb u riflessjoni,
żmien li fih ħalla l-Kelma t’Alla tinżel fuqu (ara Lq 3,2),
żmien li fih ġie mħejji għall-missjoni importanti tiegħu
li jkun prekursur tal-Mulej.
Ġwanni jgħallimna li fil-ħajja tagħna huwa importanti li
ngħaddu minn żminijiet tad-deżert, żminijiet ta’ waqfa,
li fihom nidħlu fina nfusna biex nerġgħu niskopru dak
li hu l-aktar importanti u essenzjali fil-ħajja tagħna,
speċjalment fir-relazzjonijiet ta’ bejnietna u ma’ Alla.
Ġwanni jrid jgħallimna li anke dan iż-żmien ta’ kriżi,
ikkawżat mill-pandemija, jista’ jkun verament żmien
ta’ grazzja għaliex minnu nistgħu noħorġu ppurifikati
u aktar maturi. Ġwanni jrid jgħallimna li dan iż-żmien
diffiċli jista’ tabilħaqq jinbidel fi żmien ta’ għerusija ma’
Alla, bħala poplu u bħala individwi għaliex fih nistgħu
nerġgħu niskopru mill-ġdid l-imħabba t’Alla għalina u
l-għatx tagħna għalih.
Nitolbu għalhekk lil San Ġwann jurina t-triq ’il quddiem,
speċjalment wara li tgħaddi din il-pandemija. Nitolbuh
jgħinna noħorġu minn dan id-deżert ta’ bħalissa
mibdulin fi bnedmin ġodda, ilkoll kemm aħna. Nitolbuh
jgħinna nifhmu xi jrid Alla minna, bħala Knisja, bħala
individwi u bħala parroċċa. Jekk dan iseħħ, il-Festa 2020
mhux biss tkun irnexxiet imma wkoll tkun tat il-frott
tagħha u tkun waħda mill-isbaħ festi li qatt iċċelebrajna
ad unur tal-patrun tagħna San Ġwann Battista!
Mons. Daniel Xerri