23
Wettaqt l-appostolat tiegħi fil-qasam tal-predikazzjoni u
tal-qrar f’diversi knejjes oħra ta’ Għawdex. Għal erba’
snin sħaħ u b’sagrifiċċju, kull nhar ta’ Ħadd, kont immur
bil-mixi mill-Għarb, inqarar u nqaddes fil-knisja ta’
Santa Luċija, Kerċem, mingħajr ħlas.
Għamilt tliet konkorsi għall-kappillan. Dan għamiltu
biex nobdi lis-superjuri tiegħi, mhux biex nieħu
l-ħarsien u t-tmexxija tal-erwieħ f’idejja.” 3
Ir-rabta ta’ Dun Nikol mar-raħal tagħna bdiet fit-12
ta’ Ġunju 1803 meta huwa ġie maħtur Vigarju-Kurat
tal-Parroċċa tax-Xewkija u ftit wara Kappillan sabiex
ikompli l-ħidma tal-predeċessur tiegħu Dun Franġisk
Mizzi. Kienet rabta li kellha tkun waħda twila. Dam
Kappillan sal-1850, dan ifisser parrokat ta’ 47 sena.
Nafu li għammed l-ewwel tarbija fix-Xewkija fis-7 ta’
Ottubru 1803.
Kienu bosta l-opri li wettaq fil-parroċċa tagħna. Fost
dawn insemmu biss dawk prinċipali:
o Fl-1830 bena l-koppla tal-knisja.
o Fl-1837 bena l-kappella ta’ Santa Teodora, magħrufa
aħjar bl-isem tad-Duluri, mill-flus tal-wegħdiet
li saru fi żmien l-imxija tal-kolera ta’ dik is-sena li
kienet ħalliet bosta vittmi anke fir-raħal tagħna.
o Fit-22 ta’ Lulju 1838, il-kwadru tal-Madonna tal-
Karmnu li llum jinsab fil-kappella Ta’ Ħamet, kien
telaq proċessjonalment mill-parroċċa tagħna
qabel ma tqiegħed f’postu fl-imsemmija kappella.
o Fis-17 ta’ Novembru 1844 kienet saret it-translazzjoni
b’mod solenni tal-korp sant ta’ Santa Teodora, millkappella
ta’ San Bert għall-knisja parrokkjali. Dan
kien inġab fl-1836 mill-katakombi ta’ San Kallistu
f’Ruma permezz ta’ bastiment tal-qlugħ minn
Franġisk Busuttil li ħallas ukoll l-ispejjeż. 4
o Fl-1849 huwa kien ikkummissjona l-qanpiena
ż-żgħira. Fi żmien l-Arċipiret Dun Ġużepp Grech,
din il-qanpiena kienet ġiet imġedda mill-fabbrika
ta’ Pacard fi Franza.
o Iżda bla dubju l-aktar li jibqa’ magħruf għalih hu l-fatt
li fi żmienu nġabet l-istatwa titulari ta’ San Ġwann
Battista. Kien propju fit-22 ta’ Ġunju 1845, meta issa
kellu 80 sena meta ra l-ħolma tiegħu u tal-poplu
Xewki titwettaq. 5 Feraħ mhux ftit meta dakinhar
seta’ jilqa’ bi ħġaru l-istatwa ta’ San Ġwann Battista,
skolpita fl-injam mill-Iskultur Mastru Pietru Pawlu
Azzopardi.
Isem il-Kappillan Dun Nikol baqa’ msemmi wkoll
b’rabta mal-att erojku tiegħu meta fl-1813 Għawdex
intlaqat mill-flaġell tal-pesta. Kien hu li wissa lillawtoritajiet
ċivili biex jagħmlu għassa ħarxa maxxtajtiet
speċjalment billejl bil-għan li ma jħallix
l-pesta tagħmel straġi fil-gżira Għawdxija wkoll. 6
Għalkemm il-pesta kienet ikkontrollata nafu li xorta
waħda kienu mietu mija u erba’ persuni f’Għawdex.
Meta l-piż tal-età kien qed jagħfas fuqu, huwa sab
l-għajnuna ta’ neputih Dun Pawl Grech li fis-27 ta’
Novembru 1844, inħatar Vigarju-Kurat tiegħu. Aktar
tard Dun Pawl serva bħala l-kappillan warajh. L-aħħar
magħmudija tiegħu hija datata fl-1 ta’ Mejju 1845.
Il-Kappillan Dun Nikol ingħaqad mal-Mulej fl-20 ta’
Ġunju 1850 fl-għomor sabiħ ta’ 85 sena. Sarlu funeral
mill-aqwa fejn Patri Fidiel Mariani, Kapuċċin niseġ
l-eloġju funebri.
Huwa ġie midfun fil-knisja parrokjali tax-Xewkija.
riferenzi:
1 Arkivju tal-Parroċċa tal-Viżitazzjoni tal-Għarb, Liber Matrim. Vol
I, pg 413
2 Arkivju tal-Parroċċa tal-Viżitazzjoni tal-Għarb, Liber Baptizatorum
Vol 2, pg 46
3 Patri Sefafin Borg, Gourgion 1994, Xi wħud mill-Kappillani u
Arċiprieti tax-Xewkija, jitkellemu fuqhom infushom, paġna 9
4 Ark ivju tal-Parroċċa San Ġwann Battista, Xewk ija:
La S olenne Translazione del Corpo di Santa Teodora
M. nella Chiesa Parrochiale di Casal Xeuchia.
5 Arkivju tal-Parroċċa tax-Xewkija: LaSolenne Translazione
della Nuova Statua di San Giovanni Battista, il di’ 22 Giungo 1845.
6 Arkivju tal-Kurja t’Għawdex: Il-Kappillan Dun Nikol Vella fis-27
ta’ Mejju 1813 ilmenta f’ittra tiegħu li hu bagħat lill-awtoritajiet
ekkleżjastiċi u ċivili fejn hu qalilhom li l-port t’Għawdex baqa’
ftit traskurat fi żmien il-pesta.