17
SAN ĠWANN BATTISTA
JFAKKARNA FID-DEŻERT
angelo Xuereb
Il-Battista għandu rabta kbira mad-deżert. Huwa kien
jgħix fid-deżert f’ħajja sempliċi iżda marbuta ma’ Alla.
1 - Ġwanni jgħix fid-deżert
San Luqa jgħidilna: “It-tifel kien qiegħed jikber u
jitqawwa fir-ruħ u kien jgħammar fid-deżert, sal-jum
li fih deher lil Iżrael (1,80). Id-deżert jagħmel kuntrast
mal-ibliet. Hemmhekk il-ħajja hija aktar mgħaġġla u
tista’ tkun storbjuża filwaqt li ssib aktar kumditatijiet.
Min-naħa l-oħra fid-deżert naraw is-skiet u ħajja
sempliċi. M’hemmx kumditajiet iżda hemm is-silenzju.
F’dan l-ambjent trabba San Ġwann il-Battista: ħajja fqira
u ta’ silenzju iżda li kienet tiddisponih biex jitqawwa firruħ.
Mhux ta’ xejn li Sant’Antnin ta’ Padova jqabblu ma’
ċerv. Dan huwa annimal li jiġri ħafna. U nistgħu ngħidu
li l-istess għamel dan il-qaddis. Huwa kellu grazzja
kbira li jinħeles mid-dnub tan-nisel qabel ma twieled
u l-grazzji komplew jitkattru fih kif fl-istess waqt huwa
kien jikber fiżikament u jimmatura psikoloġikament.
Fid-deżert il-Battista jurina kemm hawn affarijiet fiddinja
li ma għandniex bżonnhom. Huwa tefa’ taħt saqajh
il-ħajja komda tal-ibliet u mar jgħix fis-sempliċità taddeżert
fejn l-ikel tiegħu kien jikkonisti f’għasel selvaġġ u
ġradijiet. Dan jikkuntrasta mal-għani li kellu l-fqir Lazzru
wara biebu li kien jiekol ikel mill-aħjar u jilbes il-porpra
li kienet tqum ħafna flus. Min-naħa l-oħra l-ilbies ta’
Ġwanni kien wieħed penitenzjali: kellu libsa tax-xagħar
tal-ġemel u kellu ħżiem tal-ġild ma’ qaddejh.
2 - Bħal ċerv jaqbeż lejn l-ogħla
F’din is-sitwazzjoni l-Prekursur bħal ċerv bl-għajnuna
tal-grazzja ta’ Alla qabeż lejn l-għejun tal-ispirtu
u għalhekk kien bniedem spiritwalment għani.
Dan jgħallimna li fis-soċjetà li qegħdin ngħixu fiha
l-bniedem jista’ jkollu kollox iżda qiegħed iġarrab ilmiżerja
minħabba nuqqas ta’ sens fil-ħajja jew solitudni.
Il-bniedem huwa maħluq għal Alla u dejjem irid. Dejjem
jixtieq u donnu qatt mhu kuntent b’dak li għandu. Iżda
l-affarijiet maħluqa, għalkemm huma importanti u
jagħtu dinjità wkoll lill-bniedem, madankollu qatt ma
jistgħu jieħdu post dawk spiritwali.
Għalhekk jeħtieġ li nimxu fuq il-passi ta’ San Ġwann
il-Battista. Ma nkunux realistiċi jekk nixtiequ li mmorru
ngħixu fid-deżert. Iżda dan nistgħu noħolquh aħna
stess għal ftit taż-żmien. Dan jista’ jsir billi kultant nieqfu
mill-ġirja sfrenata tal-ħajja u nirriflettu ftit. Noqogħdu
ftit ma’ tal-familja, nistrieħu u neżaminaw lejn liema
direzzjoni miexja ħajjitna.
Fuq kollox infittxu s-skiet li f’dinja mgħaġġla huwa
rari. Iżda kultant nistgħu nrażżnu ftit l-użu tal-mezzi
tal-komunikazzjoni soċjali u midja soċjali biex insibu
ftit ħin aktar għal ta’ madwarna u għat-talb.