82
22.06.1845
Infetaħ quddiemi, il-ktieb tal-istorja,
u qrajt jien b’tant ħerqa, x’kien seħħ f’dak iż-żmien.
U ħsiebi ntrefa’, ħassejtni qed nilmaħ,
mal-ġemgħa miġbura, kien hemm anke jien.
U magħhom ħassejtni, qalb folla miġbura,
li nġabret biex tilmaħ, ta’ surtek dehriet.
U ltaqgħet fil-misraħ, il-ġemgħa kotrana,
biex tilqgħek f’raħalha, imxennqa ’l hemm ġiet.
F’dik l-għodwa ta’ mija, u sebgħin sen’ ilu,
bilkemm kont jien għadni, naf nagħmel passejn.
Ilmaħtni hemm fosthom, kont naqra ta’ tfajjel,
miżmum f’ħoġor ommi, merfugħ fuq l-idejn.
U rajtek titwassal, fuq naqra ta’ ħmara,
li kienet qed tiġbed, bil-mod karettun.
Bilkemm setgħet tobsor, li kienet qed terfa’,
Teżor tax-Xewkija, tagħhom il-patrun.
U smajt f’daqqa waħda, għajat illi jtarrax,
xħin dehret figurtek, qed tersaq bil-mod.
U żdied iċ-ċapċip, hekk kif qorbot fis lejna,
u waqfet quddiemna, bilkemm xiber bogħod.
Lil qalbi int sraqt, issaħħart wara ġmielek,
xħin kixfu xbiehetek, quddiem dawn l-għajnejn.
U f’qalbi staqsejt, jiena elf mistoqsija,
Staqsejt jien lil ommi, l’ għaliex? Kif? Għalfejn?
U ħarset fis lejja, u lissnet minn fommha,
għalfejn dak il-jum, kien tassew bil-wisq kbir,
U qaltli li kienet, mill-bogħod ġejja x-xewqa,
li statwa mill-isbaħ, ta’ Ġwanni ssir.
U qaltli li wieħed, b’kunjom Azzopardi,
bl-isem, Pietru Pawl, skultur Belti wisq prim,
intagħzel mill-kleru, u n-nies tax-Xewkija,
kellmuh bil-ħsieb tagħhom, u laħqu ftehim.
U fis xammar idu, u b’għaġeb mar sawwar,
minn siġra ta’ tuta, zokk iebes maqtugħ,
dil-vara wisq sbejħa, b’ tant reqqa u ħila,
li mliet b’ ferħ lil qalbna, l-għajnejna bid-dmugħ
U qaltli l-istorja, li sawret lil ħajtek,
u lili spjegat, għaliex int qaddis kbir.
U lilek ħabbejt, kif quddiemi lmaħtek,
u xtaqt li bħall-ġemgħa, jien ibnek insir.
U kburi ħassejtni, li kont hemm mal-ġemgħa,
li magħhom jien kont, meta għext f’ dak iż-żmien.
Għalhekk f’dan il-jum, qed b’dal-vrus inwasslilkom,
il-ġrajja li qrajt, u għaddejt fil-ħsieb jien.
Mario Attard
Tislima
F’dar-raħal ewlieni, fil-gżira Għawdxija,
qed jitla’ bħal fwieħa, mal-kant ta’ tifħir,
il-ferħ ta’ dil-ġemgħa, li ġiet issellimlek,
u ssejjaħ lil ismek, fost briju wisq kbir!
Għax m’ hemm l-ebda iben, imwieled minn mara,
li lilu ġie mlissen, dal-kliem ta’ tifħir.
Li tlissen b’tant ħeġġa, minn dak fomm missierek,
li inti tal-Għoli, profeta se ssir.
Għax sa minn twelidek, li l-anġlu ġie jħabbar,
u l-għotja ta’ ismek, li ma stennieh ħadd,
komplejt inti tikber, fil-għerf u l-qdusija,
bil-grazzja f’għemilek, għaġġibt lil kulħadd.
Int f’ħajtek kont xhieda, tal-aqwa qdusija,
lil Kristu urejt, kont għalih prekursur.
Dik ħajtek għaddejtha, imwarrab fix-xagħri,
ixxandar l-indiema, kull fejn kont int tmur.
U għax int liż-żwieġ, ridt bis-sħiħ illi tħares,
fil-ħabs lilek jitfgħu, u jżommu maqful.
U għax lil Erodi, int xlejt b’adulterju,
ħallast prezz int b’demmek, u ġejt fis maqtul.
Għalhekk dan ir-raħal, lil ismek ifaħħar,
u lilek ifakkar, kull sena bil-kbir.
Għax emmen li inti, dan kollu jistħoqqlok.
Għax int għax-Xewkin, int qaddis tassew kbir!
Kien ħafna snin ilu, li ssawret dil-qima,
ma’ mħabba, li xxettlet, minn dak l-ibgħad żmien,
li mliet lil dik qalbhom, u fawret ġo demmhom,
f’ kull ħsieb jew għemil, dehret żgur kullimkien.
Kien mija u magħhom, sebgħin sena ilu,
li xewqa ttlaħħmet, kif tfasslet fl-imħuħ,
biex minn zokk ta’ tuta, skolpita b’tant ħila,
id-dehra ta’ surtek, dlonk ħadet ir-ruħ.
U ġelbnu demgħat, hekk kif lemħu xbiehetek,
u stagħġbu bil-ħila, ta’ id dak l-artist,
li ħolqot b’tant reqqa, sbuħija tal-għaġeb,
li sebħet dal-maqdes, u lilhom wennist.
B’miġjietek hawn fosthom, fis kebset din f’qalbhom,
bħall-fjamma li ssaħħan, u ddawwal f’musbieħ,
il-ħolma u x-xewqa, li jkabbru din darek,
u jagħmlu dal-maqdes, minn fost l-aktar sbieħ.
U lejk tul das-snin, dan il-ġens irrikorra,
u lilek mar fittex, f’ kull waqt ta’ tiġrib,
għax emmen li inti, mis-sema qed tħarsu,
u minnek kull faraġ, u wens ser isib.
U għadu dal-poplu, iħobb lil dak ismek,
u jxerrdu b’tant qima, mal-erbat irjieħ.
Kull fejn huwa jmur, b’ħeġġa jsemmi lil ismek,
għax fik, huwa biss, sab li qalbu tistrieħ.
U fis għajnejh jilmgħu, kif jilmħek kull sena,
għaddej minn ġot-toroq, mżejna u sbieħ.
Għax tiegħek hu jħossu, bħal wild ta’ missieru.
Għalik għandu f’qalbu, imħabba qatigħ.
o maħbub, o qaddis, kbir Ġiovanni,
mis-sema int bierek, lil tiegħek l-ulied,
li jfakkru kull sena, b’tant ħeġġa ta’ jiemek,
tal-art u tas-sema, il-jiem tal-milied.
Mario Attard
29 t’Awwissu 2014