81
San Ġwann Battista
170 sena fostna
jjpzammit
Fix-Xewkija, fir-Rotunda
Qiegħed nilmaħ festa kbira –
Ibqgħu ċerti li l-Istatwa
Tal-Battista hi fil-mira!
Din is-sena, din il-ġawhra
T’Azzopardi, tal-injam,
Mija w sebgħin sena tagħlaq Tax-Xewkin dan kien il-pjan
Li l-Parroċċa tkun imżejna
B’din il-vara titulari
Li ħarġet minn zokk ta’ siġra –
Fl-iskultura xogħol wisq rari.
Wara dik ta’ San Gorġ martri
Mastru Pawl siġra oħra qabad,
Minnha ħareġ lill-Battista
Għerfu w dehnu miegħu rabat
Sakemm irnexxielu jnaqqax
Dan il-kbir kapolavur
Li x-Xewkin annuna jsellmu:
Viva, Viva l-Prekursur!
Bin ix-xwejħa Eliżabetta
Iben il-kbir Żakkarija,
Bla biża ‘l Erodi ċanfar
Mgħaddas f’żina, bla mistħija!
Ta’ dan Gwanni ħallas qares
Għax rasu spiċċat fuq platt,
Għax lil dan il-kbir Tetrarka
Li ma kien jibża’ minn ħadd,
Għalih ħareġ bl-ebda biża’
Biex jiftaħlu dlonk għajnejh;
Ma jħallihx jogħdos fil-ħama
‘Mma xi darba jressqu lejh!
Prim kuġin ta’ Gesu’ Kristu
Lilu għammed fil-Ġordan,
Għalkemm stqarr ma kienx jistħoqqlu
Li jaqfillu l-qfieli ‘l dan!
Tassew mela x-Xewkija
Għandha kbir Qaddis Patrun
Illi ħarstu tefa’ fuqha
W għadu hekk jagħmel sallum!
Ibqa’ iva ħarstek itfa’
Fuq uliedek ix-Xewkin
U tinsiex lil dawk imbiegħda
U mal-globu mxerrdin !
Erġa’ ejja witti t-toroq
Ta’ dil-gżira hekk mifxula,
Erġa’ llixxa l-ħotob kollha
Tal-ibliet u tal-irħula,
Biex mill-ġdid naqbdu l-mogħdija
Li twassalna għand il-Ħallieq
Li bla dubju huwa l-ħajja,
Il-verita’ u anke t-triq!
Kav Joe M Attard
Victoria Għawdex
16-1V-2015