80
Is-sider mill-kustilji mgħasses sewwa,
w’għalkemm il-qalb fl-injam l-artist le sawwar,
nistħajjel li għal Kristu ġa bdiet tħabbat,
għaliH sax-xfar bl-mħabba qegħda tfawwar.
Ftit ieħor u ħidmietu tkun mitmuma,
il-fomm, l-artist imur jisiltu l-aħħar,
għax kien minn dan il-fomm li l-Kelma tleħnet,
minn l-istess fomm sar-re Erodi ssaħħar.
L-ispalla tax-xellug xhud ta’ rġulija,
ma tmilx mar-riħ bħal qasab tal-widien,
ma tibża qatt tistqarr dak illi temmen,
fejn kelma u għemil jgħammru flimkien.
U bil-ħaruf jistrieħ ħdejn riġlu sewwa,
l-artist, mibluh, passejn jintefa’ lura;
għax kif qatt jistgħu par idejn ta’ bniedem,
inaqqxu f’zokk tas-sema kreatura?
L-idejn li Ġwanni stqarr li “mhuwiex xieraq,
li nħoll il-qorq ta’ dak li ġej warajja,”
nistħajjel lill-artist kif lesta, xtaqhom
jimtlew mill-ġdid bid-demm u jieħdu l-ħajja,
Il-ħin tat-tluq fil-qrib u l-artist beka’,
u tħallat qtar id-dmugħ mat-trab taż-żebgħa,
intgħaġnu sew flimkien fuq il-paletta,
bl-ilwien il-pniezel raw l-injam jinħeba.
u jseħħ dak il-mument fix-xatt tax-xmara,
kif b’leħen il-Missier is-sema triegħed,
biex dawk l-idejn li mhux dehen tal-ilsiera,
jogħlew it-tnejn flimkien fuq ras l-Imwiegħed.
Qed nilmaħ lill-artist fuq għatbet daru,
u qalbu qed titniegħed fl-akbar karba,
nistħajlu, lil San Ġwann jixtiequ lura,
biex jgħixu t-tnejn flimkien kif kienu darba.
San Ġwann hawnhekk nistħajlu iħeġġiġna
sabiex minn qalbna nneħħu il-kburija,
għax l-umli huwa wisq mogħġub minn Alla,
u l-ewwel għad ikun fl-hena smewwija.
‘Mma Ġwanni ġa jinsab fi triqtu sewwa,
daqt jirfes fuq il-blat tal-gżir’ Għawdxija,
iħalli x-Xatt u jaqbad il-mogħdija,
li tagħha ż-żewġ naħat bin-nies mimlija.
U hawn l-artist itemm xogħol kbir ta’ ħila,
fuq il-werrej tal-id il-leminija,
is-sebgħa li bih Ġwanni wera ‘l Kristu
“hekk hu l-Ħaruf, tad-dinja jneħħi l-ħtija.”
U kif mill-bogħod lir-raħal tagħna jilmaħ,
jaqbeż bil-ferħ, fuq wiċċu tfiġġ tbissima,
bħal meta ġewwa l-ġuf ta’ ommu tqanqal,
kif sema’ ta’ Marija it-tislima.
Jekk drabi tul ħajjitna t-triq nitilfu,
riġlejna mmiddu fi sqaqien milwija,
is-sebgħa il-werrej mill-ġdid jurina,
mergħat, b’ħaxix ħadran, bl-ilma msaqqija.
U ttella’ iz-zuntier sa ġewwa l-knisja,
sabiex kemm jgħaddu snin hu jgħammar fiha,
‘mma mhux biss ġewwa l-knisja Ġwanni tqiegħed,
sab post f’kull qalb tal-poplu tax-Xewkija.
Hawn issa l-ħidma ddur fuq ras l-Għammiedi,
li sfat minn bojja f’ħabs ħesrem maħsuda,
għax emmen illi l-għaqda l’Alla fassal,
il-bniedem m’għandu qatt jara mifruda.
Għaddew is-snin minn din il-ġrajja kbira,
u r-raħal tbiddel ħafna fl-istruttura,
iddawlu t-toroq, twessgħu u d-djar sbieħu,
tqalbu d-drawwiet u tbidlet il-kultura,
Qed nilmaħ lill-artist mal-wiċċ jindiehes,
inaqqax ix-xagħar twil sa fuq l-ispalla,
l-imnieħer ħadmu dritt ħiereġ minn ġbinu,
attent li ebda għelt ma jmur jitħalla.
‘mma ħaġa waħda qatt ma ġiet mittiefsa,
tul mija w sebgħin sena ta’ ġrajjiet,
hekk kif flimkien ħarsitna marru ltaqgħu,
l-imħabba tagħna lejk qatt ma battiet.
Ġa ħadu il-ħaddejn is-sura tagħhom,
li juru sew ta’ ħajtu il-qlubija,
in-nisġa tal-għajnejn ta’ ruħu mera’,
li sa minn ġewwa l-ġuf mid-dnub mifdija.
Int sirt wieħed ta’ ġewwa, wieħed minna,
warajk saħħart bi ġmielek lix-Xewkin,
ir-rabta ta’ bejnietna għażiż Ġwanni,
ma tista’ qatt tinħall kemm jgħaddu snin.
Mario Borg