79
Paġni Letterarji
Saħħartna bi
Ġmielek
(170 Sena mill-Wasla tal-Istatwa ta’
San Ġwann Battista fix-Xewkija)
Imnebbaħ mis-smewwiet l-artist li sawrek,
mill-qalba tal-injam ta’ Tuta xiħa,
imbierka kienu l-għodod li medd fuqek,
biex ħareġ hekk xbiehetek tant sabiħa.
Nistħajjel l-iskalpell jobrox il-qoxra,
ineħħi dak li mhux fil-qies tas-sura,
idur idur maz-zokk jgħarrex, ifittex,
sa ma’ ftit ftit jitmelles mal-figura.
Minn kmieni qiegħed Ġwanni ġa jurina,
hekk kif l-artist iz-zokk qiegħed jiżmarra,
dak li m’huwiex meħtieġ imur,jitneħħa,
“jekk siġra ma trodd x frott titqaċċat barra.”
U jonqsu id-daqqiet fis-saħħa tagħhom,
kif tibda’ tfiġġ quddiemu sew ix-xbieha,
ċkien sewwa l-iskalpell, twarrbu l-imrietel,
għax issa l-ifjen ħidma daqt mibdija.
Mad-dahar mantell, il-ħżiem, ix-xagħar tal-ġemel,
maħduma kif imnebħa min-natura,
turija ta’ snin twal ta’ penitenza
tfulija fid-deżert minn nies mistura.
L-imwarba, il-fqajrin, Ġwanni għex magħhom,
u daqshom kien jaf sew tifsir iċ-ċaħda,
ħeġġiġna l-ħobża tagħna naqsmu magħhom,
“min għandu zewġ ilbiesi jagħti waħda.”
Qed nilmaħ ir-riġlejn fl-injam jitlaħmu,
u jterrqu mal-inħawi tal-Lhudija,
u lilna jistednuna l-pass immiddu,
f’triqat li minn kull ħotba imwittija.
Il-qadd meħlus mill-għata qed jitnaqqax,
li jixhed tul ta’ ħajja bogħod mill-għana,
b’għasel selvaġġ u ġradijiet jitmantna,
u aħna bl-abbundanza mhux xebgħana.