« ХҮЛЭГ МИНИИ- ТҮМЭР МОРИН »
« Угтай хүнэй үри, һүтэй гүүнэй унаган » гээд, урданай хүнэй хэлэһэн үгэ газаагуур ошодоггүй. Дашинима гээшэш Бооройтон гэжэ ехэ бүдүүн хотон айлһаа таһарһан байха ёһотой »,— гэжэ эжымни амгалан мэндэ һуухадаа хэлэгшэ бэлэй.
Бишье өөрөө 1950 гаран ондо Улаан Үдэдэ багшын һургуулида һуража байхадаа, залуухан хүбүүн Дашинимын онгосо бүтээлгын үйлдэбэриин токарь, нютагаймни басагаар гэр бүлэ болоод байхадань, сүлөөтэй сагтаа ерэжэ, халуухан сай уужа, хошон зугаа дэлгэгшэ һэм. Тэрэ гэһээр олон жэлнүүд һубарин үнгэрөө. Мүнөө Дашинима Дамбаев түрэл нютаг Эдэрмэгтэм үнөөхил наһанайнгаа шэлэһэн мэргэжэлээр ажаллаһаар зандаа. « Алтан гартай хүн даа » гээд таниха хүн бүхэн хэлсэдэг юм.
Нэгэтэ Дашинимада ажалдань ороод, « модон шэрээ абаһамни, хоёр шүрэбынь үгы байбал, үрэжэ үгыш даа »,- гэбэб. Тэрэ станогоо тааруулаад, түмэр зоргодоһо жэржэгэнэсэ бушхуулаад, тэрэ дары ялагархан шүрэбүүдые гаргаад үгэбэ гээшэ. Һүүлээрнь һайниие хүргэхэ зуураа хэлэбэб. « Дашинима, хүдэлхыеш хажуу тээһээш ажаглан харахадам, түмэр хүлэгэй олон оньһото жолоонуудые оншотойхоноор татабалши »,— гэхэдэм, һөөл уриханаар энеэб гээ агша һэн.
Хэн мэдэбэ гээшэб. Иимэ хүн минии хүбүүнэй мэргэжэл олохо замда гол һуури эзэлхэ юм гэжэ.
Хүбүүмни нютагайнгаа олон хүбүүдээр улаан сэрэгэй уялгата алба дүүргэмсээрээ, гэртээ бусажа ерээ һааб даа.
Хэнэйшье мэдэһээр, мэргэжэлтэй болоодүй залуушуулда хаана, ямар ажалда орохонь тон шухала асуудал болодог гээшэ. Илангаяа намар албанһаа ерэһэн хүбүүдтэ бүришье таарамжагүй шэнги байдаг юм. Юундэб гэхэдэ, һуралсалай жэл эхилшэнхэй байна ха юм.
Нэгэтэ Эдэрмэг тосхондо оршодог « Первомайский » хамтын байдалай конторын газаа МТМ-е даагша Сандагай Митабтай уулзашабаб. Тэрэмнай баһал уран гартай, хёрхо нюдэтэй, хэлэһэн үгэдөө эзэн, сэхэ хүн юм.
« Роза Гармаевна, тантай уулзаха һанаатай ябаһан хүм, эндэ дайралдашаба ха юмбибди »— гэхэдэнь, « юрэдөө, ямар хэрэг гараха ушартай бэлэй » гэһэн бодол досоом түрөөдхибэ. Тэрэмни ама гарахадаа: « Би танай хүбүүнэй гэр багтаа хүдэлхыень харахадаа, гартаа дүйтэйхэн, түбһэн хүбүүн ха гэжэ һанагшаб, хамтын байдалайнгаа МТМ-дэ, Дашинимын хажууда һурагшаар орохогүй гээшэ гү? Тэрэ хүмнай 6-дахи зэргын токарь гүб даа. Хажуудань һуража гараһан хүбүүд бэрхэ токарьнууд болодог юм »,— гэхэдэнь, һанаандаа баһа һэгшэн: « Хүбүүндээ хэлүүжэм »
72