"Эхэ нютаг Хоорхэмни" Эхэ нютаг Хоорхэмни | Page 45

Зулгыхан, урихан харасатай, хоёр ехэнүүд үхибүүдэй эхэ. Басаганиинь һургуули
дүүргэхэеэ ябана. Хүбүүниинь сэрэгэй албанда байһанаа, амаралтаар ерэнхэй.
Удаадахи үринь – Галя, малай эмшэн мэргэжэлтэй. Дээрэ дурдагдаһан
хүрьгэнэйнь нүхэр. Баһал сүлөөгүй, гар табилсана. Хажуугаарнь арба гаража
ябаһан хүбүүн ороно, гарана. Батомүнхэтэн хоёр хүбүүтэй гэжэ мэдэгшэб.
Нэгэниинь ха: сэбэрш гээшэнь, зурагтал һайхан нюдэтэй. Яатараа Дундайнгаа
сэбэр шарайе абажа гараһан хүбүүн гээшэб гэжэ харанаб.
Елена - гурбадахи үринь, Улаан Үдэдэ нүхэртэеэ үнинэй түбхинэнхэй.
Экономист-бухгалтер. СМП-гэй барилгын байгуулгада ахалагша тоосогшоор
(бухгалтер) ажалладаг. Амгалан сагай үедэ баригдаһан дабхар байрада
түбхинэнхэй. Үри зөөри тэгшэ үдхэжэ, Александр нүхэртэеэ һуудаг.
Петя хүбүүниииь юрын зоной ажабайдалтай.
Зоя басаганиинь хотодо, 2 хүбүүдэй эхэ, Дабасамбу нүхэртэеэ ажаһуудаг.
Хэлхеэ холбооной оператор мэргэжэлтэй, зулгы зулуур зантай эжы болонхой гэжэ
адаглагшаб. Эдэнэй ехэ хүбүүн Амгалан хотынгоо 19-дэхи һургуулида эрхимээр
һурадаг юм. Зунайнгаа амаралтын үедэ Баяр дүүтэеэ нагаса эжыдээ айлшалдаг.
Олоной эжы Цымпилма Бадагаровна 1928 ондо хуасай угай Бада гарай
Базарсада гэжэ дунда шадалтай айлай бүлэдэ түрэһэн юм. «11 наһатай болотороо
хүгшэн эжынгээ альган дээрэ үдэһэнби. Түрэһэн эхэеэ мэдэхэгүй хүн гээшэлби
даа», - гэжэ хөөрэнэ.
Эхэһээ бага балшараар гээгдэжэ, үншэрхын далайе үзэһэн хүн ха юм даа
гэжэ бодобошье, «үншэн үзүүртээ жаргадаг» гэжэ зоной хэлсэдэгэй ёһоор,
наһанайнгаа һайн нүхэртэй ушаржа, хубиин жаргал дүүрэн эдлэжэ һууна ха
юм даа. Багахан наһандаа, 6-тай үедөө, үбгэн абадаа заалгажа, шоото дээрэ тоо
бодожо һураһаниинь наһанайнь мэргэжэлдэ ехэ туһа болоһон юм. Тиихэ зуураа
абань хэлэдэг байгаа: «Ёһоор зон хургаараа хоолойгоо тэжээхэ, бирагүй зон
хүрзөөр хоолойгоо тэжээхэ».
- Бинь ехэшье эрдэм шудалжа шадаагүйшье һаа, нүхэрэйнгөө хүдэлһэн лэ
газарта бухгалтераар ажаллажа, наһанайнгаа амаралтада гараһан хүн гээшэлби
даа. Ажабайдал гээшэ хүнгэн бэшэл ха юм даа. Зүбөөр ажаһууха гээшэ хүнэй урда
наһанай, эхэ, эсэгын буян гэжэ ойлгогшоб. 11 үринэрые түрэһэн хүм. Мүнөө 5
үхибүүдтэй, 10 аша, зээнэртэйб. Эхэ зургаан зүйл хамаг амитанай туһын тулада
гэжэ Эдэрмэг нютагайнгаа үбгэд, хүгшэдөөр һарын гурбан дүйсэндэ сугларжа,
маани, магтаал уншажа, хойтынгоо буян үйлэдэдэг һайн заншалтай болонхойбди,
- гэжэ тэрэ хөөрэнэ.
Хөөрэхыень шагнажа һуухадаа, ажагланаб: үнэхөөрөө маани мэгзэм ехээр
уншадаг лэ хадаа, энэ Дундабгай 75 наһандаа сарюун сэбсэгэр зандаа ябанал даа.
Нэгэ гомдожо, үгы биие дурдажа хэлэхэ зүйл үгы. Боди һайхан сэдьхэлтэйгээр
үтэлжэ ябаха гээшэ ехэ буян.
Дундаймнай - Жамбалай Жалсан юрын ажалша хүн һэн. Баряаша Жалсан гэжэ
алдаршаһан, холо ойро яһалал мэдээжэ хүн байһан юм гээшэл даа. Иимэ бэлиг
хүн бүхэндэ үгтэдэггүй. Угайнь тэрэ бэлиг Галина басагандань дамжан оронхой.
Хоёр-гурбан жэл болоо. Хэжэнгын дацанда Монголһоо ехэ баряаша ерээд,
хүниие аргалжа байна гэлсээн болоходонь, үхибүүдээрээ ошобобди. Тархи, үе
43