"Эхэ нютаг Хоорхэмни" Эхэ нютаг Хоорхэмни | Page 35

Зээ басаган Саша, Тамир хүбүүн хоёроо харана. Аня басаганиинь хүдөө ажахын
һургуули дүүргээд, «Динамо» бүлгэмдэ бухгалтераар ажаллана. Алена басаганиинь
оёдолой һургуули дүүргээ. Светлана буряад театрта гример 23 жэл соо ажаллана,
Аня басаганиинь Улаан Үдын 2-дохи һургуулида 8-дахи ангида һурана.
Цымпилма – хото шадархи комбикормын үйлдэбэридэ ажаллана. Оюна
Ринчин хоёр үхибүүдтэй, Вика гэжэ зээ басагатай. Долгорма – Улаан Үдын 24-
дэхи лицейдэ ажалладаг. Соёл хүбүүниинь ламын һургуулида һурадаг. Солбон
хүбүүниинь 24-дэхи лицейн оюутан.
Дамдинжаб – һанаха һайхан гансахан хүбүүниинь Хэжэнгэ нютагтаа ажаһуудаг.
Александр гэжэ хүбүүтэй. Арюуна басагатай.
Батоцырен Гатапович зургаан үринэрөө, аша, зээнэрээ бултыень энхэржэ,
эрдэм бэлиг, мэргэжэл олгуулжа шадаһан, буянтай эсэгэ, үбгэ эсэгэ болоно.
Дэршэма басаганиинь эсэгэ, дүүнэр, бүлэ тухайгаа һанан дурсан хөөрэхэдөө,
бэеэ шанга барижа һураһан олоной эгэшэ, эхын үүргэ бэедээ даажа абаһан,
нилээд даруу түбшэн зантай, холын бодолтой нютагайм эрхим басагадай нэгэн ха
юмши даа гэжэ баясан шагнажа һуугаа бэлэйб. Тиихэ зуураа Хөөрхэ нютагайнгаа
зон тухай энэрхы зөөлэхэн үгэнүүдээр дурсан һанана, нютагтаа музей эмхидхэхэ
байгаабди гэнэ.
- Хайрата уран гартай эсэгэмнай 75 наһатай болобо гээшэ. Олон үринэрынь
булта суглархадаа, 30 хүн болодогбди – гэнэ.
Батоцыренэй үргэһэн Ханду нагаса эжы гэжэ Хөөрхэ нютагтаа нэршэнхэй
бэрээлжэхэн соморхон сагаахан шарайтай хүгшэн ажаһуудаг байгаа. Энэ
хүгшэнэй уг гарбалынь үргэн сэлгеэ Сэлэнгын нютагһаа болодог. Эдир залуудаа
Хэжэнгын Хөөрхэ нютагта хадамда гаража, олон басагадай эжы боложо, бүхы
наһаяа үнгэргэһэн. Батоцыренэй өөдөө болохо, хүн бэеэ олохо наһанайнь үргэн
замда ехэтэ нүлөө үгэһэн нагаса эжынь болодог. Угһаа уран, нарин нягта, шанга
шамбай эхэнэр ябаһан хадаа басагадаа зүбөөр хүмүүжүүлжэ шадаһан, зээ хүбүүн
Батоцырендээ наһанайнь нангин һургаал үгэһэн. Энэл эжынгээ аша буянгаар
Батоцырен нютаг нугадаа хүндэтэй, олон үринэрэй эсэгэ, үбгэ эсэгэ алтан дэлхэйн
жама ёһоор элүүр энхэ, хошон зугаа хөөрөөтэй, олоной дунда сэсэн зугаа дэлгэжэ
һуудаг.
Бишье, зохёолшон, эдэ мүрнүүдые бэшэжэ һуухадаа, ехэл уяржа, нулимсаяа
аршан һуунаб. Би эдир залууһаа энэ бүлын энэрхы даруухан эжыень һайн
мэдэхэб. Хөөрхэ нютагтаа хүршэнэр ажаһууһамди. Үсөөхэн үгэтэй, даруухан
зантай, дүүрэн сэбэр шарайтай, энеэбхилһэн харасатай олоной эжы байгаал даа.
Дэршэма хөөрэнэ: «Эсэгэмнай бултыемнай эртэ бодхоожо һургаһан. Үглөөнэй
6 саг болоо, бодогты гэхэ. Тэрэнь 5 саг байха. Эртэ бодоһон үдэртэ һайн гэжэ, бүхы
ажалаа хэжэл үрдигшэ һэмди. Нютагтаа байхадаа, уһан, түлеэн, мал г