гээшэб? Илангаяа бэриеэ ехээр магтажа һуухадань, үхибүүдтэнь ямар ехэ буян болоноб гэжэ һанажа һуугаа һэм.
Галиин эжы гэжэ нютагтаа нэрлэгшэ һэмди. Басаганайнь үетэн Галиин эжы, хүбүүнэйнь үетэн Чингисэй эжы гэжэ хандадаг юм. Мүнөөшье тэрэл хэбээрээ ханданаб.
Тоонто нютагһаа Хөөрхэ зөөжэ ерэһэн тухайгаа Галиин эжы иигэжэ хөөрэнэ:
— Эсэгэмни Батанай Намсарайн Шагдар нютагаа урилхадаа иигэжэ хэлэһыень һанагшаб: « Уужам тала газарта буряад зоноороо ажаһууха ёһотойбди. Зугмаари гээшэ ехэ уйтан, хадын хабшал газарай нютаг ».
Тиигээд Хөөрхын эхин тээхи Нарин Горхон гэжэ газарта нютаглаһан гээшэ. Эжымнай Тэгшын Шэмэд гэжэ нэрэтэй һэн. Дүрбэн басагадай эхэ һэн. Мүнөө нэгэл дүү басагамни Дампилай Ханда гэжэ нэрэтэй, Монголдо Улаан Баатар хотодо үхибүүдтэеэ ажаһууна. Тэрэ хёморгоото үедэ эсэгэнь тушаагдаһан гээшэ.
1928 ондо 20 наһатайдаа нютагайнгаа Цыренэй Гүрэ гэжэ хүндэ хадамда гараа һэм. 6 үринэрые түрөөб. Тэдэнэрэйм Галина Чингис хоёрхомни зоной дунда олоной эжы, аба болонхойнууд ябанал даа.
Хамтын ажалай тогтоходо, юрын ажал наһан соогоол хэгдэһэн гээшэл даа: үнеэшэншье, хонишоншье, улаашаншье бологдоо. Загарай хүрэтэр морёор орооһо шэрэгшэ бэлэйбди.
Уһанай модондошье ябалсааб. Модо отологшо бэлэйбди. Түсэб ехэ, журам шанга. Түсэбөө дүүргээгүй һаамнай, һүни ажалдамнай гаргаха. Харанхы һүни хайшан гэжэ модо отолхобибди даа? Отолһон модоёо таллуулхабди. Модоной ажал гээшэмнай эрэл хүнэй хэхэ ажал ха юм. Тиигэбэшье бидэ, эхэнэрнүүд, эрэшүүлтэй суг адлил ажаллагша бэлэйбди.
Нэгэтэ абгайхантаяа, Дамбиихайн эжытэй, һүниин ажалда гараад, ехэл зүдэрһэн зобоһон хабди— уйлалдажа ябажа, һүниин харанхыда ямаршье ажал хэгдэхэб даа, һанаанһаам гарадаггүй. Аргамнай үгы гэжэ ама гараха эрхэгүй ябагдаал даа. Иимэл хатуу сагуудые ээм дээрээ үргэлсэһэн хүн гээшэлби даа »— гээд, Галиин эжы гүнзэгы бодол мэдэрэлдэ абтан һуухадань, ажабайдал иимэл орёо гээшэ ааб даа гэжэ бишье һанажал һуугаа һэм.
Бүүбэй Намсараевна наһанайнгаа нүхэр тухай иигэжэ дурсан хөөрэнэ: « Гүрэ долоон наһатайдаа Доржын Ошор гэжэ хүндэ монгол бэшэг заалгаа. Удаань Петровск-Забайкальскда 2 жэлэй һургуулида һуража гараа һэн. Тэрэ үедэ яһалал бэшэгтэй, һургуулитай хүн болоо гээшэ һааб даа. Шэбэртэдэ һургуулиин эмхидхэгдэхэдэ, тэндэ багшаар ажаллаһан юм.
1929— 1930 онуудаар Хөөрхэдэмнай хамтын байдал эмхидхэгдээ. Тиихэдэ Гүрэ бухгалтераар ажаллагша һэн. Һүүлдэнь 1942— 1943 онуудай үеэр Үлзытэдэ Һомоной зүблэлдэ байтараа, хамтын байдалай түрүүлэгшын тушаалтай ажаллаһан гээшэ.
28