Хүлдэ түргэн ороо һэм. Сэбэр һайхан шарайень Сэдьхэлдээ хадуужа үрдеэгүйб. Шанга дууша хоолойень Шагнаха хубида хүртөөгүйб.
ЭЖЫТЭЙ ҺЭМ
Үбэлэй хүйтэндэ модошодой, Зунай халуунда үбһэшэдэй, Намарай ольбондо хуряалгашадай – Үүрээр үрдилдэдэг, Үлдэһые садхаадаг, Даараһые дулаасуулдаг,- Загаһата нютагай Зондоо хүндэтэй Заяаша галтай Залгаа тогоошон – Эжытэй һэм.
ЭЖЫМНИ ХӨӨРӨӨНҺӨӨ
Сагаан хаанай зарлигаар Сагаан далайн эрье руу, Бусад түрэлтэн байһандаа Барлаг болон заруулхаар Баабайм Архангель ошолсоо һэн...
Аба эжыдээ зорюулһан шүлэгүүд соогоо зохёолшон эхэ, эсэгэ тухайгаа хэды гуниг шаналалаа сэдьхэлэйнгээ оёорһоо найруулнаб. Үнэхөөрөөл, энэ юртэмсэдэ хүндэ эгээл үнэтэй амиды бурхад- эхэ эсэгэ хоёр. Газар Тэнгэри хоёр. Ашыень харюулжа олон ушарта шададаггүймнайл харамтай. Арадай сэсэн үгэ: эхэ эсэгэеэ һайханаар үргэһэн хүн ашатын буянда хүртэдэг. Хэдэн үедэ үри хүүгэдыншье элүүр энхэ ябадаг.
Мүнөө үеын залуушуул « тугаар гараһан тугалнууд » мэтэ энэ саг хүрэтэр буряад-монгол угсаатан Чингисэй үри саданар ямар бэрхэшээлнүүдые дабажа, амиды мэндэ үлөөшэдынь мүнөөдэрэй хүнгэн бэшэ сагта ажаһуунабди гэжэ мэдэнэгүй. Тон гэмшэлтэйнь- сэрэгэй арын ажалда ами наһаяа эдир залууханаар алдагшадай хуби заяан юунэй түлөө иимээр тохёолдооб! Тэдээн тухай архивай зүйлнууд олдохоёо болинхой гэлсэдэг, тэрэнь бүриш гомдолтой. Зохёолшон сэдьхэлдээ бүхы наһандаа гуниглажа ябана ха юм даа. Шэнэ сагта арадаймнай зан абари урданайнгаа ёһо заншалые баримталбашье, урагшаа хүгжэнги, мүнөө сагай байдалтай зэргэ ябаха болоно гээшэ.
203