Газар дайдада хүн боложо, урда наһанай ашата буянай хүсөөр түрөөл хадаа Эхэ байгаалиин үринэр һэн тула этигэл найдалаа алдангүй, эхэ эсэгынгээ буян һургаалаар арад түмэнтэеэ ажабайдалай гүн соогуур хүнгэн бэшэ ашаатай ажамидарна гээшэ бэзэбди. Юртэмсын жама ёһоор хэды наһатайшье юм һаа, ажабайдалай һайн һайхан тээшэ бултал тэгүүлнэбди.
Һаяхан Елизавета Васильевна Бальжировагай « Худан » гэһэн номойнь удхатай танилсажа, уншагшадтаяа бодолоороо хубаалдаха хүсэлэнтэйб.
Ямар хүсэтэй зохёолнууд гээшэб, зүрхөө хүдэлгэн уяран хайлангүй уншахын аргагүй …
Номойнь оролто үгэдэ Буряадай арадай уран зохёолшо Цыденжап Жимбиев тухай тобшохоноор бэшэхэдээ, театральна хүгжэмэй училищада һураһан, Франциин алдарта драматург Мольерэй « Тартюф », мүн улаан драматургнуудай зохёолнуудай гол баатарнуудые наадаһан бэлигтэй басаган байгаа гэжэ тэмдэглэнэ.
Елизавета Васильевна бүхы наһаяа багшын ажалда зорюулһан байна. Тиигэбэшье уран зохёолнуудые бэшэхэ бэлигээ дэлгэжэ, уншагшадайнгаа һонорто өөрын онсо удхатай зохёолнуудаа « Худан » гэжэ гаршагтай ном болгожо, 1999 ондо гаргуулаа.
Тус номойнь хэдэхэн зохёолнуудай удха дээрэ тогтожо, уншагшадтаяа бодолоо хубаалдаха хүсэлэнтэйб.
Номойнь түрүүшын нюурта « Джарун Хашорой субарга » гэһэн шүлэг үгтэнэ.
Ая гангаар анхилһан Хэжэнгэдэ, Арюун Бургаастайн аглаг үбэртэ Арад олоной ашатынь буянда Алтан ганжар толотон гэрэлтэхээр Дахинаа шэнээр мүндэлхэнь Джарун Хашорой субарга...
1991 он.
Зохёолшон зүн бэлигээрээ мэдэржэ, үнэхөөрөө үнгэрэгшэ жэлэй намар Хэжэнгэдэ Джарун Хашорой субарга мүндэлжэ, олон зоной, Ороной ахамад ноёдой хабаатай баярай оршондо мүргэл, үргэл хэгдээ бэлэй. « Буряад-монгол угсаатан » гэһэн шүлэг сооһоо хэһэг:
Шэжэр мүнгэн дэнзэтэй, Шэршүү торгон дэгэлтэн,
201