Дүрбэдэхеэр, « Гэсэрэй » нэрээр тэмсээн соносхожо, хүдөө нютагуудаар тамирай байшангуудые барюулха. Эрхимлэгшэдтэ шан үгтэхэ. Энэнь арадай асуудал шиидхэлгын нэгэ янзань болохо болоно. Хэнээшье мэдэһээр, залуушуулай сүлөө сагаа хүхюун зугаатайгаар үнгэргэжэ байха арга тон бэрхэтэй гэжэ мэдэнэбди.
Табадахяар, « Гэсэрэй » удхаар оперо зохёожо, түрэл буряад арадаа баясуулаа һаа, хэды һайхан бэлэй даа?
Зургаадахяар, хотодо « Гэсэрэй » хүшөө ба талмай бии болгохо. Тэндэ арад зон сугларжа, сүлөө сагтаа элдэб һонин наада зугаа хэхэ, мүрысөөн, барилдаан эмхидхэгдэжэ, соёл болбосоролой гуламта болохо һэн.
Залуушуул сүлөө сагтаа бэеэ хэхэ газаргүйдэһэн дээрэһээ элдэб муу харгыгаар ябадаг болоһониинь мэдээжэ.
Түгэсхэлдэнь, манай уран зураашад үльгэрэй удхаар зурагуудые үнгэтэ шэрээр зуража, бултанда бэлэглэхэ бэзэ гэжэ найдая.
Түрэл буряад арадайнгаа « Гэсэрэй » алдарта ойе эрхим бэлэдхэлтэйгээр угтахые уряалнаб. Юрэдөө, буряад арад хэнһээ дутаха болооб?
1991
ОЛОН БОДОЛ ТҮРҮҮЛНЭ Эрдэм һуралсалай шэнэ шатада
Улаан Үдэ хотын һургуулинуудай буряад хэлэ заадаг багшанарай шэнэ һуралсалай жэлэй эхиндэ секционно хүдэлмэри Октябриин аймагай 17-дохи һургуулида һаяхан үнгэргэгдэбэ.
Үнгэрэгшэ жэлдэ хотын 43 һургуулида 74 багшанар 9 мянган үлүүтэй үхибүүдтэ буряад хэлэ зааһан байна. Байгша һуралсалай жэлдэ залуу багшанар олон ерэбэд: багшанарай дээдэ һургуулиин эхин ангиин шэглэл, буряад хэлэнэй шэглэл, багшалгын колледж дүүргэһэншье залуушуул бии.
Үнгэрэгшэ һуралсалай жэлдэ буряад хэлэнэй 3 багшанар 13-дахи зэргэдэ шалгалта гараба. Нэрлэбэл, 17-дохи һургуулиһаа Очирова Д. Б., 47-дохи һургуулиһаа Жигжитова Д. Ж., 2-дохи һургуулиин багша Балабанова Г. М. гэгшэд амжалтатай хамгаалаа.
Аргын түбэй хүдэлмэрилэгшэ Абидуева Ульяна Ешеевна багшанарта шалгалта тухай тодорхойгоор хөөрэжэ танилсуулба, зоригжуулба.
Ороной үндэһэтэнэй номой һанһаа Тумунова В. Т. шэнээр хэблэгдэһэн номуудтай багшанарые танилсуулжа, эдэ шухаг номуудые худалдалжа абалган болоо.
Урдань тус һургуулиин багша Дулма Бальчиновна « Арадайнгаа ёһо заншалда түшэглэн » гэһэн сэдэбдэ элидхэл хэжэ, ехэл анхаралтайгаар шагнабабди. Жэшээнь, тулгын 3 хүлдэл, 3 үхибүүтэй бүлые дүүрэн гэжэ нэрлэдэг. « Нагасын зүгһөө һамга абахадаа, нара ногоо татажа һууха », « галдаа муу шорой богоо оруулхагүй- Миранза хаан, Галай эзэн уурлаха », « Галтай сусал газаа хаяжа
159