"Эхэ нютаг Хоорхэмни" Эхэ нютаг Хоорхэмни | Page 142

ажаллана. Энэ хугасаа хадаа бүхы эдир залуу наһанайнь бэлиг шадабари, сэдьхэл
зүрхэнэйнь уряа бодол Буряад ороноймнай олон тоото үри хүүгэдээ хүн болгожо
бүрилдүүлхэ, эрдэм бэлиг олгохо, хүмүүжэл абаха замайнь эхиндэ нэн түрүүн
эхынь уялга дүүргэжэ ябаһан, эсэшэ сусашагүйгөөр ажаллажа ябаһан үсөөхэн
намтартай багша— хүмүүжүүлэгшэ гээшэ ааб даа.
Гушан жэлэй туршада 3 анги, 3 дүүргэлгэ, 1-дэхиһээ абажа, һургуулияа
дүүргэтэрынь, далииень хүсөөжэ, олохон лэ хүбүүд, басагадые олоной дунда
табиһан гээшэл даа. Иимэ удаан болзор соо таһалгаряагүйгөөр хүдэлһэн
хүмүүжүүлэгшэ тус һургуулиин түүхэдэ үгыл ёһотой.
Евдокия Хашкоевна али бүхы юумээр һонирходог, яажашье һаань, хэндэшье
туһалхал бодолтой ябадаг энэрхы сэдьхэлтэй хүн лэ даа. «Түрэл интернат минии
хоёрдохи гэрни гээшэл даа» гэжэ хэлэхэдэнь, тиимэш байгаагүйдөө аргань үгыл
даа: 10 жэлэй туршада үхибүүн бүхэндэ болбосорол, хүмүүжэл үгэжэ табина ха
юмбибди. Һурагшад ямар хүмүүжэл һургуулидаа абаа һэм, тэрэл шэгээрээ абари
зан, хараа бодолынь бүхы наһандань хүтэлбэри болон үлэдэг ха юм .
Евдокия Хашкоевна зарим һурагшадаа омогорхон нэрлэнэ: Комиссаров
Анатолий Андреевич Буряад Ороной габьяата эд засагтан (экономист),
Цыбикдоржиев Дашинима Дагбаевич—дид хурандаа (подполковник), Түнхэнэй
аймагай военком. Намжилов Виктор Оросой 3 дахин абарга. Юсудуров Андрей,
Егоров Саян—шуһата Чечняда 2 дахин ошоһон габьяатай байна. Дагданова
Дарима, Цыренжапова Гэсэгма—ИГУ дүүргэһэн юристнүүд.
Удаан саг соо һурагшадтаяа тэрэ хамта орон соогуураа аяншалһан юм.
Жэшээнъ, Москва-Ленинград, Алма Ата-Таллинн, Хабаровск-Владивосток-
Находка. Иигэжэ һурагшадтаяа холын аян замда ябахадаа, хэды олон юумэ
мэдэхэ болохоһоо гадна, залуухан үхибүүдэй ухаан бодолой болбосорхо замда
ехэл һургуули, һургаал болоно ха юм.
Тиихэдэ Хара далайн эрьедэ оршодог «Артек», «Орленок» гэһэн бүхэоросой
зуһалангуудташье һурагшадаараа амарһан намтартай.
Хүндэтэ Евдокия Хашкоевнагай ажалайнь намтар харахада, золтой буянтай
атаархамаар багша гээшэ. Хэды олон түрэлхидэй үршөөлдэ хүртэдэг гээшэб. Хэды
удаан саг соо түрэл «Туяа» зуһаландаа һурагшадтаяа зунай зулгы сагта, нуурай
эрьедэ ажаллааб, амарааб, хүдэржөөб, ажалай ёһотой дүршэл һурагшадтаа олгооб.
Евдокия Хашхоевнагай залуу наһандань наһанайнь хани нүхэр гээгдэбэшье,
гурбан үхибүүдтээ эрдэм бэлиг тэрэ олгуулаа. Хоёр ашанартай. Баир ашань
лицей-интернадайнгаа һурагша юм.
Удаан сагта һурагшадаа эрхимээр хүмүүжүүлгын хүнгэн бэшэ ажалда
шалгарһанайнь түлөө «Хүмүүжүүлэгшэ-методист» гэһэн хүндэтэ нэрэ зэргэ
олгогдонхой. Эрхим багшада гүрэн түрын хүндэтэ нэрэ зэргэ олгогдохол бэзэ
гэжэ найдаха дуран хүрэнэ. Иимэл багша-хүмүүжүүлэгшын ажал үндэрөөр
сэгнэгдэхэл ёһотой гээшэл даа.
Евдокия Хашкоевна удаан саг соо ажаллаһан багшанараа Сэсэг Егоровна,
Галина Дармаевна, Екатерина Ивановна гэгшэдээ үнэн зүрхэнһөө һургуулиингаа
ехэ ойгоор амаршалаад, элүүр энхые, үндэр амжалта хүсэнэ. Түгэсхэлдэнь
бултанай зүгһөө эрхим хүмүүжүүлэгшэ багшада иимэ үреэлээ хүргэебди.
140