һуралсалаа дүүргэжэ, дээдэ һургуулинуудай 1-3-дахи ангинуудта ородог байгаа. Мүн саашаа һуралсалаа һайнаар үргэлжэлүүлжэ, һайн мэргэжэлтэд боложо гарадаг һэн. Мүнөөшье лицей тэрэл янзаараа ажалладаг гэжэ мэдээжэ. Эндэ Валерий Васильевичай үүргэ тон ехэ гэжэ мэдэгдэнэ.
Залуу мэргэжэлтэн ажалдаа эдэбхи үүсхэлтэй, уран бүтээлтэй, хододоо шэнэ онол аргануудые бэдэрэлгын арга саг үргэлжэ хэрэглэдэг, түрүү бодолтой хүтэлбэрилэгшэ гэжэ ойлгохо шухала. Ажалайнь үрэ дүн дээрэ эли тодоор харагдана гээшэ.
2000 оной декабрь һарада Улаан Үдын эрдэм һуралсалай захиргаанай даргаар томилогдоо. Юрэнхы дунда һургуулинууд, хүүгэдэй сэсэрлигүүд, хүүгэдэй тамирай һургуулинууд, эдиршүүлэй клубууд, хүүгэдэй урлагай гэрнүүд – бүхы хотын һуралсалай албан газарнүүд Улаан Үдэ хотын һуралсалай захиргаанай мэдэлдэ ородог.
Юрын үгөөр хэлэжэ болохын аргагүй иимэ ехэ харюусалгатай ажал даажа ябаха гээшэ ямар хүндэб. Энэ хүндэ ашаае Валерий Васильевич даагаад, удаахан саг соо ажаллажа ябана гээшэл даа. Нютагаархидынь баясанабди, омогорхонобди, сэдьхэлээрээ дэмжэнэбди.
Валерий Васильевичай гэртэхин тухай дурсангүй аргагүй: эсэгэнь Хэжэнгэ нютагһаа уг гарбалтай Василий Михеевич Сергеев бүхы наһандаа малай эмшэ мэргэжэлтэй ажаллаа. Даруу зулгы зантай, зон нүхэдөөр олон, эрхим мэргэжэлтэн, нютагтаа хүндэтэй хүн бэлэй даа.
Эжынь Надежда Илинаровна налгай зантай, бүхы наһандаа хүниие эмшэлдэг мэргэжэлтэй, наһанайнгаа амаралтада гаранхай. Гүрэнэй олон шангуудтай, аша зээнэртээ энхэргэн зөөлэн, түрэлхид, нүхэдөө хүндэ ямбаар угтажа, хүл хүнгэн буянтай һуудаг юм.
Иимэл эхэ эсэгын үринэр, угтай хүнэй үри Валерий Васильевич гайхалтай даруухан зулгы зантай, хүдэлһэн ажалдаа бүтээсэтэй, бүхы зондо хүндэтэй, табиһан зорилгоёо дүүргэдэг, эрилтэ ехэтэй эрхим мэргэжэлтэндэ амжалта, үндэр нэрэ соло нютагаархидайнь зүгһөө хүсэе.
2003
ЭНЭРХЫ СЭДЬХЭЛЭЙ ЭМШЭ « Баатар мэргэн – 2005 » гэһэн тэмсээндэ
Хэбэд номхон Хэжэнгын эхин Хөөрхэ нютаг тоонтотой Галсан Доржиевич Гутапов эдир залуу наһанһаа арад зоной элүүр энхые сахилгын эмхинүүдтэ ажалша түгэс хүдэлжэ, аргашан хүнэй үндэр нэрэ зэргые арюун абажа ябадаг юм. Дээдэ Хэжэнгын Эдэрмэг нютагай дунда һургуули эрхимээр түгэсхэһэнэй удаа Улаан Үдын медучилищи 1964-68 онуудта һуража дүүргээд, түрэһэн нютагтаа фельдшерээр хүдэлжэ, аргашанай ажалда шэлжэжэ эхилһэн юм.
132