Нэгэтэ Ангархаев Б. Д. Лысов В. Ф. хоёр Эдэрмэгтэ суглаа эмхидхэхэеэ ерээ бэлэй. Лысов В. Ф.( мүнөө наһа баранхай) хэлээ агша һэн: « Малайнгаа бэлшээриие юундэ үтэгжүүлнэгүйбта? Шэбхэ адхахаяа яанабта? Үлэн хооһон малтнай талха таряандаа оронгүй яаха юм? Бэлшээриеэ һайн болгоо һаатнай, тоһо, мяхан элбэгжэхэ гэжэ өөһэдөө мэдэнэт »,— гэхэдэнь, Буда Дабаевич хэлэбэ: « Һаяар шэбхынгээ саанаһаа харагдахаяа болихот. Египедэй пирамидадал адлинууд, шэбхэтнай болонхой ». Тиихэдэнь би бодожо һуугаагша һэм: « Ажал һайнаар хүтэлбэрилхын тула олоншье ноёд хэрэгтэй бэшэ гээшэл даа ».
Тэрэ гэһээр олохон жэл үнгэрөө даа. Теэд газарнайш тэрэл хэбээрээ хэбтэдэг лэ даа. Урагшагүй зондо ухаагүй ноёд үнгэрхэдөө, « целина », « шэнэ газар » гэлдэжэ, ямаршьегүй бэлшээриингээ газарые хахалжа, хүрьһыень урбуулжа хаяад, мүнөө болоходо, газарнай хүндөөр шархатаһан мэтэ, улаан шоройгоор хиисэжэ хэбтэхэ юм. Харамтай!
Нэрлээдшье яахаб, хамтын байдалай нэгэ ноёндо хэлэбэб: « Хэды олон хонид тосхониие тойроод, зун бүхэндэ бэлшэнэб? Газарайнь харлашатар. Зүү хаяа һаа, олдохоор болотор мүлжэдэг, хүрьһөөрнь гар хажуураар сабшаһан мэтэ. Шэбхэ адхажа тараагаа һаатнай Аса Шэбэрэй аршаанта уһан шэбхэтэй хамтаржа, талаар тараа һаа, хүрин хилгана хиидэжэ, хамаг хони малтнай хүллэхэл бэлэй даа »,- гэхэдэм: « Шэбхэ үгы гүб даа ».
Тиихэдэнь: « 200 гаран үрхэтэ айлай газааһаа арбан гаран шэргүүл шэбхэ гараха: ажалай һүүлдэ шэргүүл табижа үгэбэл, үглөөгүүр болотор шэбхэеэ ашажа үгэхэ байгаал даа. Уһатай һубагуудые зубшуулаад, шэбхэеэ тараажархёо һаатнай, хэды зэргэ ногоон ургаха байгааб!»— гэхэдэм: « Энэ ажалаймнай түлөө мүнгэ түлэхэгүй гүб даа »,— гээ агша һэн. Ехэл голхороо һэм. Мүнөөшье тэрэл хэбээрээ. Шэбэрэй уһан талаар урдажа, һубаг эреэн маряан толбонууд болон холоһоо харагдадаг. Газарые үтэгжүүлхэ, ашаг үрыень дээшэлүүлхэ хэрэгтэй гээшэ юм ааб даа. Үглөө эдихэ өөхэнһөө, мүнөө эдихэ уушхан дээрэ гэһээр лэ, иимэл тулюур байдалда булта ороод байна гээшэлди даа.
Гармын Дамдин ехэл холын хараа бодолтой, ажалай түлөө үнэн зүрхэнһөө оролдодог хүн гэжэ ойлгоё. Иимэ эдэбхитэй, урагшаа һанаатай хүндэ ноёд дурагүй, үбгэжөөлые хамтын байдалһаа гараха болоторнь шүүмжэлээ хамнай.
Боориин ногооной үрэжэлгүй болоһондо сэдьхэлээ хүдэлгэжэ « ногооной үрэһэеэ хаятарнь, сабшалгаяа долоон хоногоор хойшолуулая »- гэһэндээ ямар ехэ шүүмжэлэлдэ оробо гээшэб. Үбгэнэй дурадхал зүбтэй бэшэ гү? Уншагшад, булта бодожо үзыт.
Хамтын байдалай ажалда хонишоноор бүхы наһаараа хүдэлһэн Бумөөдэйн дүрэ хэды һайшаалтайб! «... Хуудам сагаан талада буряад эхэнэрэй хони харюулжа ябахые хараа һэн гүт? Тэрэнэй ажалые тиимэшье хүнгэхэн гэжэ бү һанагты. Хонишон бүхэли үдэртөө хүл дээрээ ябадаг.
Хабарай хара һалхиндашье, зунай галдама халуундашье, намарай саһа бороондошье, үбэлэй янгинама хүйтэндэшье, һалан һандангүй, нөөхил хонидоо дахажа ябадаг ха юм даа. Зундаа халуун нарандашье, аадар борооһоошье хоргодохын аргагүй. Үбэлдөө галзуу, дошхон һалхин гам хайрагүйгөөр ямаан дахыень нэбтэ яһанай хуудаһаар үлеэдэг. Хээрэ талада ябатарнь һалхи шуурган
113