шэнэ, шэнэ зүйлнүүдээр жэл бүхэндэ заншалта болгожо, олон һурагшадай, түрэлхидэй хабаадалгатайгаар бага хурал-хөөрэлдөөнүүдые үнгэргэжэ байхаар түсэб табигдаа. Энэ ехэ туһатай ажал гэжэ булта бодонобди. « Модоной үндэһэн газар доогуур, хүнэй үндэһэн газар дээгүүр » гэжэ хүн гээшэ уг удхаяа, түрэһэн үдэһэн тоонто нютагаа, зон голоо мартаха ёһогүй гээшэ бэзэбди. Олон һургуулинуудта манай ажал дэмжэгдэхэ бэзэ гэжэ найдая. Таһаг соомнай бүхы уг гарбал тухай нэмэжэ, һэльбэжэ байдаг самбар бии болонхой. Һурагшадай анхарал ехэ татадаг: хоморой дэбтэр, фото-зурагуудшье олон ха юм даа.
Март һара соо мэдээжэ шүлэгшэн Ц. Дондогойн « Эхэ тухай поэмэ » гэһэн номоорнь уншагшадай бага хурал үнгэргэжэ, Эгэтын Адагай нютагаархидынь, хотын һургуулиин багшанар, һурагшад хабаадажа, сэдьхэлэй дулаахан хөөрэлдөөн, шүлэгүүдыень һурагшадай уншалган болоо һэн. Сугларһан хүндэтэ айлшад баярай дулаахан үгэнүүдые хэлэжэ, зохёолшын шүлэг дээрэ найруулһан ирагуу дуунуудшъе зэдэлээ. Иигэжэ һурагшадаа уран зохёолшодой зохёолнуудаар танилсуулха гээшэ ехэл үрэ дүнтэй ажал гэжэ тооломоор. Зохёолшонай нютагаархид иимэ хүшэр үедэ нютагайнгаа басаганай зохёолнуудай хэблүүлхэ ушартань туһалжа шадаха байһанаа мэдүүлбэ.
Ерэхэ һуралсалай жэлдэ хараалһан түсэбүүд тон ехэ: Агуу Илалтын 50 жэлэй ойдо зорюулһан хэмжээ ябуулганууд, Гэсэрэй 1000 жэлэй ойдо зорюулһан үдэшэнүүд, уулзалганууд, һурагшадаа гоо хэлбэрэй шэглэлтэйгээр хүмүүжүүлхэ талаар дуу, хатарай бүлгэмүүдые эмхидхэхэ бодомжо бии.
Түгэсхэлдэнь, түрэл һонинойнгоо нюураар Буряадайнгаа олон тоото багшанараа һурагшадаа, түрэлхидынь « бэрхэшээл дүүрэн дэлхэй дээрэ бэе бэеэ гамнажа » урагшатай, урма зоригоо алдангүй, эрдэмэй үргэн харгые амжалтатай гаталаял даа гэжэ үреэнэб.
1994
БУЛТАНДА ТАНИЛ БҮМӨӨДЭЙ БА БУСАД
Б. МУНГОНОВОЙ « Харьялан урдаа Хёлгомнай » гэһэн роман буряад зохёолой һунгадаг зохёолнуудай нэгэн. Мүн ахалагша ангида зохёол үзэжэ эхилхэдээ, энэл зохёолһоо эхилдэг. Би энэ романда хэмжээлшэгүй ехээр дурладаг хүм: удхань, дүрэшүүлэйнь абари зан, хэһэн хэрэгүүд хүдөөгэй зоной ажабайдалые бодотоорнь харуулна ха юм.
Тэдэнэртэй хамта ажаһууһан шэнгеэр һурагшадтаяа хөөрэлдэхэш: хүдөөгэй ажалшадай үхибүүдтэ заана ха юмбибди. Тэдэнэрэй ухаан бодолой болбосорхо ябадалда горитойхон нүлөө үгэжэ шадаха гайхамшагта зохёол. Тиигэбэ яабашье багшын дүршэлһөө нилээд дулдыдаха гээшэ.
Зохёолшын өөрынгөө нютаг Шэлын хамтын байдалай ажабайдал дээрэһээ
111