Ажаһуудалдаа , ажалдаа тон наринаар , эрилтэ ехэтэйгээр хандадаг хүн гээшэ һэн ха . Зоной ажаһуудалда ехэл һанаагаа табидаг юм һэн . Нэгэтэ орооһо татуулжа , зондоо хубаажа үгэһэндөө зэмэтэй болоһон юм . Ажалдань ходол шалгалта бологшо һэн гээд һанагшаб . Улаан Үдэ ерэжэ хүдэлхөөршье уригдаһан юм . Һүүлдэнь бэень муудажа , хүндөөр үбшэлжэ , 1953 ондо наһа бараа бэлэй .
Теэд яахашье аргагүй сагай болошоходонь , бэеэ шангаар барижа , үлэһэн хоёрхон үринэрөө хүлыень дүрөөдэ , гарыень ганзагада хүргэхэ эхын уялга гэжэ мэдэрээ бэзэб даа : сэдьхэлээ шумуулажа , бэеэ сэхэлэн хатуужаха саг тохёолдоһон гээшэ .
Бэрхэшээлтэй үе сагууд ходорон ошоо даа ... Үхибүүднишье олоной дунда дүүрэн жаргал эдлэжэ ябана . Хүнэй ажабайдал орёо : Чингис хүбүүмни хоёрдохи бүлэтэеэ түбхинэнхэй . 4 үхибүүдэй эсэгэ . Буряадай арадай зүжэгшэн гэһэн хүндэтэ нэрэ зэргэтэй , хори гаран жэл соо Буряадай театрта зүжэгшээр ажаллана . Зүжэгшэн байхаһаа гадна , уран зохёолшье бэшэдэг , олон дуу зохёоһон юм . « Хуһахан » гэжэ дууниинь арадай дуун мэтэ , бултанда мэдээжэ болонхой .
Бэримни Цэндэжап гэжэ нэрэтэй . Ага нютагтаал адли , тэнюун дэлгэр зантай даа . Басаганһаам нэгэшье дутуугүй , илдам зөөлэхэнөөр хандадаг , хүндэмүүшэ налгай юм . Урин дулаахан гарһаань бэлэгүүдые абажал һуудаг хүм . Сэдьхэлдээ бэриеэ хүлеэжэл байдагби .
Галина басагамни багшын дээдэ мэргэжэлтэй юм . « Буряад үнэн » һониндэ ажаллана . Хоёр зээнэрни Дарима , Цырендондог дээдэ һургуулитайнууд , 4 зээнэр бии гээшэ . Хаа яахан ажалаараа ерэжэ , мэндэеэ мэдүүлээд , маанадаа баясуулаад бусадаг .
Үтэлхэ наһандаа урда үнгэрһэн хүшэр сагуудые мартантаад лэ , үхибүүд , аша зээнэрэйнгээ жаргалаар жаргалсажа , Бурхандаа зальбаржа , шадал соогоо маани мэгзэмээ уншажа , буян үйлэдэжэл һуудаг гээшэлби даа .
Урин дулаанай болоходо , Хөөрхэ нютагаа ошожо , Улаан Хададаа мүргэжэ , зальбаржа , нютагаархинаараа уулзажа , эльгэлжэ , амар мэндэеэ мэдэлсэжэ , сэдьхэлээ тэниилгэжэ баясадагбди . Түрэлхидни нютагтам ехэл олон : эгэшэ , дүүнэрэйм үхибүүд хүдэр шадалтай , түбхинэнхэй һуудаг юм . Һайндэрөөр тушаалдажа айлшалангаа , үндэр наһатай нютагаархидайнгаа амиды түүхын үгэ шагнаха бодол баһал байдаг гээшэ ».
Галина басаганиинь халуун эдеэгээр , орон дэлхэйн сэржэмээр маниие хүндэлнэ . Эжыдээл адли урин налархай , даруу түбшэн зантай , холые бододог , ухаансар хүн гээд һанагшаб . Эжынгээ үтэлхэ наһандань ехэл һайханаар хүндэлжэ , үргэжэ , үгын зөөлэнөөр хандажа , эдеэнэй зөөлэнөөр хооллуулжа , унтариин зөөлэнөөр ямбалжа , ашатын буянда хүртөөжэ байһан үринэр байна даа .
Урданайнгаа ажабайдал нютагайнгаа аршаанууд тухай Бүүбэй Намсараевнагай ехэл һонирхомоор хөөрэхэдэнь , уншагшадтаяа хубаалдаха бодол түрэбэ .
Наяад онуудай эхин багаар гээшэ һэн ха . Хөөрхынхид ехэл олоороо Шэтын можодо оршодог Бэлэрын аршаанда ошонод гэлсэгшэ һэн . Тэрэл үедэ нютагаархинаараа аршаанда ошолсоһоноо хүгшөөдэй хөөрэбэ : « Нэгэтэ ангуушан аршаанай эхиндэ хандагай буудаба ха . Шархатаһан тураг хүлөө халуун аршаанда хээд , ойро зуура хэбтэтэрээ , үнишье болонгүй бодоод , харайжа арилһан юм ха . Тэрэ сагһаа эндэ домто аршаан бии гэжэ зон мэдэхэ болоһон гэхэ .
29