1997
« ХҮХЭ ҮНГЭТЭЙ ҮНЭГЭН »
Буряад театрайхид « Алтан соёмбо » гэжэ нэрэтэй һургуулиин һурагшадта зорюулһан зүжэг табиха гэһэн түсэбөө бэелүүлхэнь.
Һаяхан багшанарые суглуулажа, М. Батоинай « Хүхэ үнгэтэй үнэгэн » гэжэ зүжэг харуулжа, багшанарай шүүмжэлэл үнгэрбэ.
Театрай эрхим зүжэгшэд тон һонирхолтойгоор найруулаан табижа, тэрэнь алишье талаараа бултанай һайшаалда хүртэжэ, багшанар үндэрөөр сэгнэжэ, тогтоон абаба.
Һургуулиин буряад хэлэнэй олон багшанар һанамжануудаараа хубаалдаха зуураа, зарим тэды ажаглалтануудые хэбэ. Жэшээнь, 3-дахи лицей һургуулиин ахамад багша Х. Б. Пурбуева үгэ хэлэхэдээ тэмдэглэбэ: « Ехэ һайнаар найруулагдажа, үндэр нэрэтэй зүжэгшэдэй хабаадалгатайгаар гүйсэдхэгдэһэниинь тон һайн. Зүгөөр зарим үгэнүүдэйнь удха һурагшадта ойлгосогүй байха. Тэдэниие толи шэнгеэр гү, али зурагаар харуулаа һаа болохо байгаа »,- гэхэ мэтын ажаглалтануудые хээ. Минии һанахада, үхибүүдтэ зорюулһан иимэ зүжэг мүнөө сагта тон хэрэгтэй: гол удхань ойлгогдохо, бодото зүжэгшэдэй уулзахашье гээшэмнай али тухай ехэ гээшэб. Еһотой уран гоёор түрэлхи хэлэн дээрээ хэлэжэ, амитадай сэдьхэл, дурые уран үгын хүсөөр, аяг зангаарнь харуулжа байхадань, һурагшадта ехэ һонин, мартагдашагүйгөөр хадуугдаха юм. Һурагшадһаа гадна багшанар, түрэлхидшье һонирхон харахал.
Бултанай талые хаража, хотынгоо һургуулинуудаар зүжэгшэд өөһэдөө ябажа харуулха гэжэ түсэблэһэниинь бултанда һайшаагдаба. Түрэлхи хэлэеэ зааха, хүгжөөхэ талаарнай тон ехэ туһатай байхань дамжаггүй.
Дэмбэрэлтэй ажалдань амжалта хүсэе!
1996
БАГА ҮХИБҮҮДЭЙ НААДАНХАЙНУУД ТУХАЙ
Һүүлэй хэдэн жэл соо дэлгүүрнуудай тагууд дээгуүр үхибүүдэй нааданхайнуудай хоморжоһон ушар бултанда мэдээжэ.
Энэ зун амаралтада гарахадаа, Улаан Үдынгөө гол гудамжаар яаралгүйхэн, ябатараа, « байза аша басагаяа баярлуулмаар ямархан нааданхайнуудые абаашажа үгэхэмни ааб »,— гээд бодохо зуураа һананаб: хоёртойхон болохоёо
163