Зөвлөгөө 21
Нэр дэвшигч Баатаржавын МӨНХСОЁЛын зөвлөгөө
ГАДААДАД ТЭТГЭЛЭГТЭЙ СУРАЛЦАХ БОЛОМЖ ХҮН БҮРТ НЭЭЛТТЭЙ ЮУ ?
Боломж нээлттэй , харин боломжийг ашиглах нь зөвхөн танаас шалтгаална . Тайланд , Франц , АНУ-д суралцсан намайг боломжтой айлын хүүхэд гэж боддог хүн цөөнгүй . Үнэндээ төсвийн цалинтай ээж минь картын барааны хүнд хэцүү үед гурван тэрсхэн хүүхдээ дотоодын сургуульд оруулж төгсгөсөн нь хамгийн том хөрөнгө оруулалт байсан юм . Чанартай суурь боловсрол эзэмшсэний ачаар би мөнгөгүй байсан ч дэлхийн шилдэг сургуулиудад суралцаж чадсан . Яг үнэндээ би урьдах ажлаа л сайн хийдэг байснаас бусдаас онцгой сэтгэдэг байсандаа тэтгэлэг авсан юм биш . Хичээлдээ , ажилдаа мэрийлттэй надад зөвлөж туслах , энд тэндхийн тэтгэлэгт хөтөлбөрүүдийн талаар мэдээлэл өгөх сайхан сэтгэлтэй хүмүүс олон тааралдаж байсныг хэлэх хэрэгтэй . Нэг ёсондоо боломжууд өөрөө чамайг ангуучилж иртэл нь хичээлдээ , ажилдаа чин сэтгэлээсээ хандах хэрэгтэй . Миний хамгийн сайн хийж чадсан зүйл бол боломж бүрийг алдахгүйг хичээж байсан явдал юм . Интернет , дэвшилтэт технологийн ачаар дэлхийн энтэй мэдлэг олж авах боломж улам бүр нээлттэй болсоор байна . Мөнгө байхгүй гэдэг шалтгаанаар мөрөөдлөө бүү хязгаарлаарай . Мэдлэгийн зуун болох энэ эрин үед амьдарч байгаа эрхэм дүү нар минь зорилгынхоо төлөө шантрахгүй зүтгэж чадвал дэлхийн хаана ч үнэлэгдэх өндөр боловсролыг олж авч чадна . Та бүхэндээ амжилт хүсье !
ТЭТГЭЛЭГ АВАХ ГОЛ ШАЛГУУРУУД :
Сургуулийн голч оноо чинь 3.5-аас дээш байхад тэтгэлэг авах магадлал өндөр . Хичээлээс гадна нийгмийн идэвхтэй , тэмцээн уралдаан олимпиадад ордог бол том давуу тал болно . Ирээдүйн зорилго , хүсэл мөрөөдөл , сургуулиа төгсөөд эх орондоо болон дэлхийд юу өгч чадах хүн болохоо илэрхийлсэн эссе бичих нь бас маш чухал . Мэдээж чамайг сурлага сайтай , мэрийлттэй , бусдаас онцгой болохыг чинь баталсан багш эсвэл даргын тодорхойлолт онцгой үүрэгтэй . Энэ бүгдээс хамгийн чухал нь англи хэлний чинь мэдлэг буюу TOEFL , IELTS-ийн өндөр оноо юм . Харин магистрт сурах бол ямар мэргэжлээр сурахаас шалтгаалж GRE , GMAT гэсэн шалгалтуудыг бас өгнө . Нэг зүйл нэмж хэлэхэд аль болох шилдэг сургуулиудад л материалаа явуулаарай . Учир нь өндөр үнэтэй , дэлхийн шилдэг сургуулиуд авьяаслаг мундаг оюутнуудыг тэтгэлгээр татаж сургуулийнхаа нэр хүндийг өсгөх , өндөрт өргөх сонирхолтой байдаг . Дэлхий таны өмнө нээлттэй байна . Хичээгээрэй залуусаа !
ТЭТГЭЛЭГ АВЧ БОЛОХ СУРГУУЛИЙН МЭДЭЭЛЛИЙГ ХААНААС ХАЙХ ВЭ ?
Тэтгэлэг хайх маш олон вебсайтууд байдаг . Үүнээс цөөхнийг нь дурдвал
http :// scholarship-positions . com / http :// www . studyjapan . go . jp / en / toj / toj0302e . html http :// www . earcmn . org / http :// www . educenter . mn / news / show / id / 6 АНУ-ын Засгийн газрын тэтгэлэгт хөтөлбөрүүд http :// mongolia . usembassy . gov / masa . html Японы Засгийн газрын тэтгэлэгт хөтөлбөрүүд http :// www . studyjapan . go . jp / en / toj / toj0302e . html