Voorsittersverslag
Geagte Aandeelhouer
As beleggingsbeheermaatskappy en meerderheidsaandeelhouer van Senwes Beperk, rapporteer ons met
vreugde dat die Groep in staat was om voort te gaan met die sluit van strategiese vennootskappe. Die
proses het deel gevorm van konsolidasie in die landbou-omgewing.
Nieteenstaande twee opvolgende droogtejare was die Senwes Groep steeds in staat om voort te bou op sy
strategiese pad na 2020. Die bedryfsmaatskappy moes ‘n laer volumevloei deur die silonetwerk sowel as
laer spanderingspatrone deur landbouprodusente op kapitaalgoedere en insetprodukte hanteer.
Gedurende die jaar onder oorsig het Grindrod Trading Holdings (Edms) Bpk, ‘n logistieke maatskappy in die
Remgro stal, ‘n 20% aandeelhouding in Senwes Beperk bekom. Grindrod het die infrastruktuur en batebasis
wat hom ‘n belangrike rolspeler in die sagtekommoditeitswaardeketting maak.
Die 51% aandeelhouding van Senwesbel, plus die aandeelhouding van Grindrod, maak dit moontlik vir die
Groep om bepaalde voordeel te trek uit hierdie verhouding.
Sinergieë kan nou verken word met Grindrod se krag in
verskeping en logistiek, wat bepaalde ondersteuning
aan Senwes se graanverhandelingsbeen bied ten
opsigte van uitvoere. Grindrod word verteenwoordig
deur ‘n direkteur op die Direksie van Senwes.
Gedurende die paar maande sedert dié verkryging,
het Grindrod homself bewys as ‘n betroubare en
waardevolle vennoot en ons sien uit na die verdere
verkenning van geleenthede tussen die maatskappye.
Senwesbel het sy voorneme om met NWK
Beherend Beperk van Lichtenburg saam te smelt
aangekondig, wat ook belyn is met sy strategiese
fokus van konsolidasie in die landbousektor. Ons
sien uit daarna om hande te vat met NWK. Die nuwe
produsentehouermaatskappy kan as platform dien vir
verdere transaksies. Die transaksie is so gestruktureer
dat Senwesbel die voertuig sal word vir ‘n nuwe
houermaatskappy vir beide bedryfsmaatskappye. Die
huidige aandeelhouers van Senwesbel sal 59% van
die aandele in die nuwe houermaatskappy hou en die
huidige aandeelhouers van NWK Beherend Beperk sal
41% van die aandele hou. Die nuwe houermaatskappy
sal die meerderheidsaandeelhouer in NWK (59%) en
Senwes (51%) wees. Die bedryfsmaatskappye sal
voortgaan om outonoom besigheid te bedryf.
Internasionale mededingers belê toenemend in Afrika
en Suid-Afrikaanse beleggers soek aktief beleggings-
geleenthede in die Suidelike Afrika landbousektor.
Die tydsberekening van ons transaksie is gunstig.
ʼn Meer kompeterende, gediversifiseerde landbou-
beleggingshouermaatskappy, wat beheer word deur
produsente, sal suksesvol kan reageer op hierdie
veranderende marktoestande.
5
Senwesbel Verkorte Jaarverslag 2014