E T C C O N T E S T S F A L L / W I N T E R 2 0 2 2
Lorenzo Levy
Quaedam Prex
Rōbora tanta tibī , Sāturnie tūtor aquārum , multaque crēdita sunt ! vastās tua nūmina vīrēs quae venerāmur habent , habuērunt , posthoc habēbunt cum cernent pelagus tantummodo saecla nepōtum . Cum validō saevās undās domināre tridentī , tum deus es terram sōlus quī vexat eōdem . Quot monumenta tuī terrae mōtūs abolērunt ! Num maculāvit vel Phidiās vel vulgus Achaeum nūmina Neptūnī tantō vitiō violentī ut scelere atque malō vīsīs incēnsus in altō saevus eburneolum ruerēs raptor simulācrum ? Quaeve simultātēs frāternae corda tenēbant ut frātris statuam propriō templō lacerārēs ? Glōria quae tuita est clārissima Olympia lāpsa est sīc miserā arte tuā , Neptūne potēns et inīque . Paenituitne deōs dominōsque perinde Colossī nec mūrōs vīctōs expugnātōre repulsō ? Taedēbatne adeō Sōlem radiārefigūram ut peteret fortī ab domitōre maris furibundī excidium dōnī miserābile mōtibus amplī ? Mausōlēum cum fabricīs īnsigne sepulcrum prīmigenō mōtū , Neptūne , friāre nequīrēs et super āmēns esse audēret rēgia sēdēs , parcere mīlle annōs negitābās laedere bustum dum remanēret deinde nihil nisi saxea mōlēs . Pendulus hortus sī praesēns Babylōnius umquam tū quoque dēlēssēs , animōse proterveque cūstōs ! Fās fortasse fuit faciendum , Fātaque fīlum sīc secuēre colō fūnestō morte tribūtā . Quaenam dūrābunt ? etiam quoniam optima linquunt-- dēsine , sī fās est , Neptūne , ciēre labōrēs !
P R I M A | 3 3