Myndir mánaðarins MM Desember 2019 Bíóhluti | Page 14
Bíófréttir – Væntanlegt
Þeir John Thornton og Buck verða fljótlega nánir og góðir vinir
enda sér John það strax að Buck er enginn venjulegur hundur.
Hinn leyndi þráður ...
Ævintýraunnendur eiga von á góðu 21.
febrúar þegar myndin The Call of the
Wild verður frumsýnd en hún er byggð
á samnefndri smásögu Jacks London
sem kom út árið 1903 og er fyrir löngu
orðin sígild. Leikstjóri er Chris Sanders
sem gerði m.a. teiknimyndirnar Lilo
& Stitch, How to Train Your Dragon og
The Croods og með aðalhlutverk hinna
mennsku fara þau Harrison Ford, Karen
Gillan, Bradley Whitford, Dan Stevens,
Wes Brown og hinn franski Omar Sy.
Aðalkarakter myndarinnar er samt hundurinn Buck sem í upphafi
sögunnar lifir hamingjuríku lífi sem vel metið gæludýr dómarans
Millers og fjölskyldu hans í Santa Clara-dalnum í Kaliforníu.
Klondike-gullæðið er nýhafið og því fylgir mikil eftirspurn eftir
sleða- og dráttarhundum enda þurftu þeir sem vildu fara til
Klondike að taka með sér minnst tonn af mat og öðrum nauð-
synjavörum. Svo fer að Buck er stolið af óprúttnum mönnum sem
selja hann síðan í ánauð sem dráttarhund gullgrafara. Eftir mikið
harðræði sem gengur mjög nærri Buck tekst honum loksins að
sleppa úr prísundinni með aðstoð góðhjartaðs manns að nafni
John Thornton. Upp frá því gjörbreytist líf þeirra beggja til hins
betra og Buck á eftir að sanna að hann er engum öðrum hundi
líkur þegar hann verður leiðtogi allra hunda og úlfa á svæðinu.
Buck og öll önnur dýr í The Call of the Wild eru tölvuteiknuð og
geta áhugasamir séð hvernig sú nákvæmnisvinna lítur út í tveim-
ur stiklum úr myndinni sem komnar eru á netið.
Myndin er tekin upp í Vestur-Kanada, þ. á m. þar sem
atburðir hennar gerast í Klondike í Youkon-héraðinu.
14
Myndir mánaðarins
Jim Carrey mætir aftur á hvíta tjaldið eftir langa fjarveru sem
hinn illi og lævísi Ivo Robotnik sem lumar á lúmsku plani.
Broddgöltur á flótta
Það kannast allir tölvuleikjaunnendur
við broddgöltinn Sonic sem hefur verið
aðalkarakter tölvuleikjaframleiðandans
Sega allt frá 1991 þegar hann kom
fyrst fram. Lengi hefur staðið til að gera
bíómynd um Sonic og þann 14. febrúar
verður draumurinn að veruleika þegar
Sonic the Hedgehog verður frumsýnd.
Í myndinni kemur Sonic á harðaspani til
jarðar á flótta undan geimverum sem
vilja klófesta hann til að komast yfir
leyndarmálið að hraðanum sem hann
ræður yfir en Sonic getur hreyft sig og hlaupið á a.m.k. hljóðhraða.
En þetta er eins og að stökkva úr öskunni í eldinn því þegar fréttist
af jarðarkomu broddgaltarins fráa er hinn illa innrætti Ivo Robotnik
(Jim Carrey) strax sendur út af örkinni til að klófesta hann. Það
sem yfirmenn Ivos vita ekki er að hann hefur síður en svo í hyggju
að skila Sonic til þeirra heldur ætlar hann að nota hann til að ná
sjálfur alheimsyfirráðum. Hvort sú áætlun gangi eftir kemur í ljós.