Magasin Magasini | Page 14

Inoqatinut attaveqaatinik
pinngitsuuisinnaannginneq
Nittartakkami inoqatinut attaveqaatit
nalinginnaaleqqangaarmata
pingaaruteqangaarmatalu
pinngitsoorsinnaanngingajappagut.
Misilillugu Facebook allallu ulloq
ataaseq takunaveersaarniarpakka,
paasiniarlugu qanoq misiginarnersoq

All.: Sorlannguaq Petersen
Immaqa ilisarisinnaassavat ullaakkut iteruit mobilivit itersaataa qamikkukku
makinnginnerni Facebook takoqqaarlugu. Imaluunniit ullormut
arlaleriarlutit mobilit kaasarfinnit eqqarsariaqqaarnak amusarpat Facebook
takuniarlugu. Imaluunniit kammalaativit allassimasat likersimaneraat
takupallalaalaarusuttarpat, naak allanik suliassaqaraluarlutit. Soorluuna
ulluinnarni pinngitsoorsinnaajunnaaveqqagigut.
Tamakkuninnga attaveqaatinik nammineerlunga atuisorujussuugama, ulloq
ataaseq takunaveersaarnissaanut artornasinnaasumik imminut suliakkerpunga
Facebook, Snapchat, Twitter aamma Instagram takunngiivinniarlugit. Uani
ataani misileraaninni qanoq misigisimanerlunga eqqarsarsimanerlungalu
malinnaavigisinnaavat. Marlunngorneq 11. marts ulloqeqqanut aallartippunga.
Nal. 13.10: Akunneq ataaseq sinnilaarlugu Facebook aamma Snapchat
takunngilakka. Ajorpallaanngilaq, naak minutsit qulikkaapajaarlugit
Facebook takorusullattaagaluarlugu. Nuummi Ilimmarfimmi internetsimut
attaveqaannavikkama misileraaninnut ajornaqutaalaarpoq.
Nal. 14.09: Unikaallakkaangama Facebook takuniarlugu
eqqarsalertarpunga. Allaanngilaq arlaannik ilisimasassannik
arajutsisaqarlunga.
Nal. 19.43: Inoqatinut attaveqaatit 8 tiimingajak takunngereerlugit
allaanngilaq pujortaguttorujussuulluni. Soorlu pujortarunnaarniarlunga
nalunagulu kavaajanni tupaateqarlunga ikitseriaannaallunga.
14

Assigiinngissutaaginnarpoq Wi-Fi aqqutigalugu internetsersinnaagama
Facebookkilu takusinnaanagu.
Nal. 20.25: Facebookkimi allatara takorusungaarakku kammalaatima
Facebookkianit marseqquara tunuanillu isiginnaaqataallunga takuara.
Allassimasut takullugit eqqissiallannaqaaq tuallattutullu misigivunga.
23.40: Facebookkimi kikkut isersimanersut takusariaqavissorlugu
misigivunga, taamaammat mobilinni Facebook-messenger toorpara.
Ingerlaannaq peqqissimeriarama takorpiarnagulu qameqqipallaannarpara.
Nal. 00.09: Innarpunga 12 tiimi Facebookkera toqqaannartumik
iserfiginngiivinnikuullugu, qaangiunnissaanullu qilanaalereerlunga.
Nal. 09.25: Siniffimmiik makikkama mobilinnit Facebook
iserfigingajappara, eqqaavarali aatsaat akunnerit marluk sinnilaarlugu
qaangiuppat takusinnaallugu.
Ulloq ataaseq inoqatinut attaveqaatit atunngiivinnikuullugit,
ulloqeqqarnissaanut minutsit marluinnanngortut Facebook iserfigaara.
Susoqarnersoq takusinnaanngorlugu eqqissiallannartutut misiginarpoq.
Aappaatigulli eqqarsaatigaara takunnginnerulaartarsinnaagaluarlugit, inuillu
eqqanniittut eqqarsaatiginerullugit samminerusinnaallugit.